Նախօրեին ԿԳՄՍ փոխնախարար Ժաննա Անդրեասյանը հայտարարել է, որ փորձելու են վարել մասնագիտությունների խոշորացման քաղաքականություն, պետք է խուսափեն մասնագիտությունների մասնատվածությունից: մասնավորապես, որպես օրինակ բերել է այն, որ 200-300 ուսանող ունեցող մասնագիտական կրթության հաստատություններում կազմակերպվում է շուրջ 20 մասնագիտության կրթություն:
Այս խնդրի առնչությամբ «Առաջին լրատվական»-ի հետ զրույցում ԱԺ «Իմ քայլը» խմբակցության պատգամավոր Հովհաննես Հովհաննիսյանը նշեց, որ քոլեջների խոշորացման քաղաքականությունը արդեն մի քանի տարի է, վարվում է, սակայն դա չի ենթադրում մասնագիտությունների խոշորացում:
«Միգուցե ճիշտ է, որ մասնագիտությունները պետք է խոշորանան, բայց զուգահեռաբար պետք է նոր պահանջված մասնագիտություններով ուսուցում բացվի: Մասնավորապես, տնտեսագիտական մասնագիտությունների գծով պետք է ունենանք կառավարում, մարկետինգ և այլն: Նաև պետք է տարանջատվեն բուհի և միջին մասնագիտականի կրթական չափորոշիչները: Միջին մասնագիտականը ավելի շատ պետք է կենտրոնանա այնպիսի մասնագիտությունների վրա, ինչպիսիք են խոհարար, խառատ, էլեկտրիկ և այլն»,-ասաց նա:
Հարցին, թե որքանո՞վ է մեր կրթությունը համապատասխանում աշխատաշուկային այսօր, Հովհաննես Հովհաննիսյանը պատասխանեց. «Խնդիրն այն է, որ նախ պետք է սահմանել, թե որն է աշխատաշուկան: Աշխատաշուկայի ամբողջական մանրակրկիտ վերլուծություններ Հայաստանում փաստացի չկան: Կարող ենք աշխատաշուկան որոշել գործատուների կողմից աշխատանքային մասնագիտություններ առաջարկելու հիման վրա, ինչպես օրինակ, նրանք կարող են ունենալ IT ոլորտի, ինժեներների կարիք և այլն: Բայց կա նաև այլ մասնագիտություններ, որոնց կարիքը շատ մեծ է, ասենք շինարարության ոլորտում՝ էքսկավատորչիկ, բուլդոզերչիկ, մեխանիզատոր և այլն: Երբ որ վերլուծությունը մանրակրկիտ կարվի, այդ ժամանակ էլ կարելի կլինի ասել, թե ինչ մասնագիոտթյունների մասով բաց ունենք»:
Նա անդրադարձավ նաև ԵՊՀ-ում ստեղծված ճգնաժամայինիրավիճակին և դրանից դուրս գալու ուղիներին՝ նշելով. «Նախ ԵՊՀ-ն պետք է մաքսիմում դուրս գա քաղաքական պրոցեսներից, հանդարտության դաշտ մտնի, որովհետև մենք տեսանք, որ համարյա բոլոր այն մարդիկ, որոնք խոսում էին ԵՊՀ-ի խնդիրների մասին, հայտնվեցին այս կամ այն ուժի ցուցակում: Այսինքն ինչ-որ տեղ կարելի է կասկածել, որ այդ մարդկանց խնդիրն ավելի շատ ոչ թե ԵՊՀ-ն էր, այլ ընդհանուր քաղաքական մթնոլորտը: Այս քաղաքական երկփեղկված իրավիճակում ամեն մեկը պետք է զբաղվի գործով և խնդիրը մոտ ժամանակներս կլուծվի:Համենայնդեպս, ես այդպիսի հույս ունեմ»:
Նա նկատեց, որ միշտ էլ ԵՊՀ-ում տարբեր թևերի բաժանված են եղել, դա նորություն չի. «Բայց պետք է լինի մեկը, ով էդ բոլորին կբերի միասնական դաշտ, կփորձի հանդարտեցնել, և ամեն մեկն իր տեղում կանի իր գործը»:
Հարցին, թե օրենքով ռեկտորների ընտրության կարգը փոխվելուց հետո կարո՞ղ ենք ակնկալել ԵՊՀ-ի խնդրի լուծում կարճ ժամանակում, Հովհաննես Հովհաննիսյանը պատասխանեց. «Նախ ճիշտ կլիներ, որ ՍԴ-ն կարծիք հայտներ, նոր Ազգային ժողովը այդ հարցը կարգավորեր: Ըստ նոր օրենքի տրամաբանության ռեֆորմներ պետք է արվեն: Ես ակնկալում եմ ՍԴ-ից օբյեկտիվ քննություն և որոշում»:
Լուսանկարը՝ panorama.am-ի
