Ռուսական «Պրոմոբոտ» ռոբոտը աշխատանքի է անցել Դուբայի ոստիկանությունում:
Ռոբոտը մարդկանց խորհրդատվություն է տրամադրում, պատասխանում է հարցերին, ընդունում է դիմումներ և կարգավորում է մարդկանց մուտքն ու ելքը: Այն կարողանում է հաղորդակցվել անգլերեն և արաբերեն լեզուներով: Ստեղծողների խոսքով՝ սա միակ, այսպես կոչված,վսերվիսային ռոբոտն է, որը խոսում է արաբերեն:
«Ռոբոտի օգնությամբ մենք թեթևացնում ենք մեր աշխատակիցների ծանրաբեռնվածությունը և համավարակի ընթացքում սահմանափակում ենք նրանց շփումը մարդկանց հետ: Ոստիկանները միշտ արագ և ճիշտ որոշումներ պետք է կայացնեն և մենք թույլ չենք տա արտաքին գործոնների ազդեցությունը նրանց աշխատանքի վրա: Դրանից կախված է մեր քաղաքացիների անվտանգությունը, առողջությունը և նույնիսկ կյանքը»,- ասել է Դուբայի ոստիկանության ղեկավարի տեղակալ Ահմադ Ալ Բայարին:
Ռուսական ռոբոտներն աշխատանքի են անցել Ղազախստանի ոստիկանությունում, Թուրքիայի բջջային կապի ընկերություններում, Օմանի ազգային բանկում և Աբու-Դաբիի ոստիկանությունում:
Անցած տարի նոյեմբերին հայտնի դարձավ, որ ռուսական «Պրոմոբոտ» ընկերությունը Չինաստան է արտահանելու ռոբոտներ՝ 500 հազար դոլար արժողության:
Այս ընկերության ռոբոտներին կարելի է հանդիպել նաև «Ռուսաստանի ժամանակակից պատմության թանգարանում», «Դուբայ» մոլում, «Բալտիմոր-Վաշինգտոն» օդանավակայանում:
