Վրաստանի Մարտվիլի համայնքում տարաձայնությունների առիթ է դարձել թեմի առաջնորդի որոշումը, որով նա թեմական երկու հոգևորականների արգելել է պատարագների ծիսակարգ անցկացնել: Որոշումից դժգոհ հավատացյալները պահանջել են թեմի նոր առաջնորդի հրաժարականը, հաղորդում է «Ռուսթավի 2» հեռուստաալիքը:
Տեղի մի քանի տասնյակ բնակիչներ մուտք են գործել թեմի առաջնորդարան, բարձրացել շենքի երկրորդ հարկ ու փորձել են բացել գրասենյակի դուռը: Այդ պահին երկրորդ հարկի պատշգամբի փայտե բազրիքը հրմշտոցի ճնշման տակ պոկվել-ընկել է, որի հետևանքով պատշգամբում գտնվող շուրջ տասը մարդ ընկել է երկրորդ հարկից: Նրանց թվում են եղել նաև վրացական չորս հեռուստաալիքների լրագրողներ։
Տուժածներին տեղափոխել են հիվանդանոց: Վրաստանի ՆԳՆ-ն հետաքննություն է սկսել միջադեպի փաստով:
