Վարդենիսի գյուղերը պատրաստ են ընդունելու Քարվաճառից, այլ շրջաններից եկող քաղաքացիներին, տալ նրանց ապաստան, ապահովել սննդով և այլ անհրաժեշտ պարագաներով: Այս մասին «Առաջին լրատվական»-ի հետ զրույցում ասաց Վարդենիսի Գեղամասար խոշորացված համայնքի ղեկավար Հակոբ Ավետյանը:
Նշենք, որ այս օրերին հատկապես Քարվաճառի շրջանից մարդիկ քանդում են իրենց տները, բեռնատարներով տեղափոխում են Վարդենիսի շրջան, որ գոնե կարողանան ժամանակավոր կացարաններ կառուցել ու ապրել: Քարվաճառի բնակիչները անգամ անասուններն են տեղափոխում Վարդենիսի շրջան. «Մենք նախ սննդով ու առաջին անհրաժեշտության ապրանքներով ենք աշխատում օգնել: Մեր համայնքների բնակիչները ընտանիքներին ընդունում են իրենց տները, ժամանակավոր ապաստան են տալիս: Մշտական ոչ ոք չի կարող իր տանը ապաստան տալ, բայց բոլորը օգնում են, ով ինչով կարող է: Տեղավորում են մարդկանց, մինչև այդ մարդիկ հասկանան ինչ կարող են անել»,-ասաց Ավետյանը:
Անդրադառնալով ժամանակավոր կացարաններին, համայնքապետն ասաց, որ իրենց 18 համայնքներում կան կիսակառույց տարածքներ, որոնք կարող են անհրաժեշտության դեպքում տրամադրել, որ կառուցեն, ու ապրեն այդտեղ.«Բայց դա լինում է տուն սարքել: Թե նրանք որքանով ի վիճակի կլինեն, չգիտեմ, քանի որ դիմացն էլ ձմեռ է, մի քիչ բարդ կլինի:
Բայց ես տարածքներ կարող եմ տրամադրել բոլոր 18 համայնքներում էլ»,-ասաց նա:
Ավետյանը նշեց, որ մշտական քննարկումներ են գնում քաղաքային, մարզային իշխանությունների հետ , որ հնարավորության սահմաններում բոլորին օգնություն, օժանդակություն տրամադրվի: «Չի կարող լինել, որ մեկը մեզ ինչ-որ առաջնային բանով դիմի, բայց մերժվի:
Համայնքապետն ասաց, որ արդեն շատ եկողներ կան Արցախից, որ ցանկանում են մնալ իրենց համայնքներում: Գեղամասարը, հիշեցնենք, խոշորացված համայնքն է և ներառում է 18 համայնք:
Հակոբ Ավետյանն ասաց, որ արդեն իսկ նորոգվում են հակառակորդի գնդակոծության հետևանքով նաև իրենց համայնքներում վնասված տները. «Մարդիկ ինչով կարողանում են օգնում են, նորոգում են իրենց տները: Չենք ուզում այս ծանր պահին այդ բեռն էլ թողնել պետության վրա»,-եզրափակեց համայնքապետը:
