«Սևանա լճի էկոհամակարգի վերականգնումն այսօր ազգային խնդիր է. Սևանա լիճը մեր տարածաշրջանում նախևառաջ խմելու ջրի բացառիկ շտեմարան է: Սևանա լճի էկոհամակարգի վերականգնումը ենթադրում է լճի ավազանի և հարակից բնակավայրերի զարգացման նոր մոտեցումներ ու հայեցակարգեր: Այդ ամենը պետք սկսել կարգի հրավիրելով ու կանխելով էկոհամակարգի խաթարումը»,- այս մասին «Առաջին լրատվական»-ի հետ զրույցում ասաց շրջակա միջավայրի նախարար Ռոմանոս Պետրոսյանը: Նախարարի խոսքով՝ այս պահին Սևանի էկոհամակարգը գտնվում է աղետալի վիճակում, այդ խնդրի լուծման համար քաղաքական կամքի կարիք կա. «Սևանը կորցնելու վտանգի առաջ ենք, ազգային հարստության այսպիսի վատնումն անթույլատրելի է»:
Անդրադառնալով դիտարկմանը, որ հանքարդյունաբերության խնդիրները, մասնավորապես Ամուլսարի հարցը հրատապ են, Ռոմանոս Պետրոսյանը նշեց, որ կան հարցեր, որոնք այսրոպեական միջամտության կարիք ունեն, հարցեր կան, որոնց միջնաժամկետ լուծումներ պետք է տալ, և կան հարցեր, որոնք պահանջում են բոլոր հարթություններում ինֆորմացիայի տիրապետում, ինչը կազդի լուծումների վրա:
«Ամուլսարի մասին շուրջ 10 օր բավականին նյութեր եմ ուսումնասիրել… Այս պահին դեռևս զերծ կմնամ գնահատական տալուց, քանի որ այն պետք է լինի փաստարկված և պետք է բխի հասարակության և փորձագիտական կարծիքներից: Առայժմ կօգտվեմ 100-օրյա լռության իրավունքից: Մանրազնին ուսումնասիրելուց հետո պարտավոր եմ կարծիք կազմելու և արտահայտելու: Եթե ռիսկեր կան, որոնք կառավարելի չեն և հղի են մեր ժողովրդի առողջությունը վտանգելու սպառնալիքով, ապա բնականաբար դիրքորոշումը կլինի բացասական, եթե ռիսկերը կառավարելի և կանխատեսելի են և թույլատրելիի շրջանակներում են, ապա դիրքորոշումը այլ կլինի»:
Ռոմանոս Պետրոսյանի խոսքով՝ Կառավարությունը չի ձգձգում Ամուլսարի հարցի լուծումը, այլ բացառապես հենվում է մի քանի ինստիտուտների կարծիքների և գործունեությունից բխող արդյունքների վրա: «Այս հարցը քաղաքական չէ, այլ սոցիալ-բնապահպանական է, ինչ-որ առումով նաև սոցիալական է: Շրջանակներ կան, որոնք այս հարցը փորձում են քաղաքականացնել: Այս հարցն ունի բազմաթիվ նուրբ հարթություններ, որոնք պետք է հաշվի առնել որոշում կայացնելիս»:
«Ամուլսարի հարցով շահառուները բազմաթիվ են. կան ակնառու և թաքնված շահառուներ»,- ընդգծեց Ռոմանոս Պետրոսյանը:
Մանրամասն՝ տեսանյութում:
