Լրահոսում բավականին տեղ է զբաղեցրել «Իմ քայլը» խմբակցության ներսում առկա մթնոլորտի և հակասությունների թեման, ըստ որի Նիկոլ Փաշինյանը բավականին կոշտ հարցադրումներ է արել Քաղպայմանագիր կուսակցության վարչության նիստում, ընդհուպ պահանջելով վայր դնել որոշ պատգամավորների մանդատը: Ընդ որում, ըստ հրապարակումներից մեկի, այդ շարքում են նաև ԱԺ նախագահ Արարատ Միրզոյանի այսպես ասած հովանու ներքո գտնվող պատգամավորներ: Որքանով են իրականությանը համապատասխանում այդ տեղեկությունները, և որքանով են դրանք մտացածին, իհարկե դժվար է ասել, հայկական մամուլն այդ առումով վստահությունը կորցրել է վաղուց:
Միաժամանակ պետք չէ բացառել, որ ներքաղաքական հակադրության ներկայիս թեժ փուլում նախկին իշխող համակարգը փորձում է այդօրինակ տեղեկատվությամբ ևս ազդել քաղաքական մեծամասնության ներքին մթնոլորտի վրա: Մյուս կողմից սակայն, մի բան անկասկած է, որ մեծամասնությունը ժամանակի ընթացքում ավելի ու ավելի «հասակով» է կանգնելու ներքին ճշգրտումների և բյուրեղացումների խնդրի առաջ, հաշվի առնելով այն հանգամանքը, որ այդուհանդերձ մեծամասնությունը ձևավորված է ոչ թե քաղաքական գործընթացների տևական տրամաբանության, այլ հեղափոխական հավաքականության սկզբունքով: Այդ սկզբունքը թույլ է տալիս իրականացնել հեղափոխություն, հասնել հաջողության, բայց կառավարման արդյունավետության հարցում այդ սկզբունքն այլևս օգտակար չէ, և ավելին՝ սկսում է դառնալ խանգարող, ընդ որում թե հնարավոր սուբյեկտիվ, թե օբյեկտիվ հանգամանքների բերումով:
Խնդիրը ավելի ու ավելի զգալի է լինելու վարչապետ Փաշինյանի համար, և թերևս այն հեղափոխական պոռթկումները, որ լինում են նրա վարքագծում, պայմանավորված են նաև հենց այդ խնդրի հանդեպ զգայունությամբ: Բանն այն է, որ, եթե կառավարման թիմը առավելապես հեղափոխական հավաքականության տրամաբանության շրջանակում է, այդ թիմի առաջնորդը ևս ստիպված է իրադարձություններն ու իրավիճակը կառավարել հեղափոխական տրամաբանությունը թարմ պահելով: Ամբողջ խնդիրն այն է սակայն, կառավարելիությունն այդ տեսանկյունից կարող է ձեռք բերել ավելի ու ավելի առերևույթ, մակերեսային բնույթ, իսկ խորքում իրադարձությունները դուրս գան վերահսկողությունից, հանգեցնելով արդեն ներիշխանական պայթյունային ֆորս-մաժորային իրավիճակի: Թեև, չի բացառվում և այն, որ Նիկոլ Փաշինյանը հասունացնում է հենց այդ իրավիճակը, ներթիմային կտրուկ լուծումների գնալու համար, ինչը կարող է ընթացիկ տրամաբանության մեջ բարդ լինել հենց հեղափոխական համատեղ քայլի հանգամանքով:
Լուսանկարը՝ Photolure-ի