Անցած գիշեր Երևան են ժամանել Եվրախորհրդի խորհրդարանական վեհաժողովում (ԵԽԽՎ) Հայաստանի հարցով համազեկուցողներ Ջոն Պրեսկոտն ու Ակսել Ֆիշերը:
Այս մասին տեղեկացնում է Ազատություն ռադիոկայանը։
Ինչպես նշված է ԵԽԽՎ-ի պաշտոնական կայքում տեղադրված հաղորդագրությունում, Պրեսկոտը և Ֆիշերը փաստահավաք այս առաքելության շրջանակներում Հայաստանի իշխանությունների և ընդդիմության հետ քննարկելու են երկրում քաղաքական միջավայրի բարելավմանն ուղղված վերջին զարգացումները: Անդրադարձ է լինելու բարեփոխումների ծրագրերին, հատկապես՝ 2012 թվականի խորհրդարանական ընտրություններին ընդառաջ ընտրական բարեփոխումներին:
Ըստ պաշտոնական տեղեկատվության՝ նախատեսված են հանդիպումներ Հայաստանի նախագահի, խորհրդարանի խոսնակի, խորհրդարանական խմբակցությունների, ինչպես նաև արտախորհրդարանական ընդդիմության հետ:
Ազգային ժողովից «Ազատություն» ռադիոկայանը տեղեկացել է, որ համազեկուցողները չորեքշաբթի օրը հանդիպելու են խորհրդարանական ուժերի հետ:
Ջոն Պրեսկոտը և Ակսել Ֆիշերը հանդիպելու են Կոնգրեսի առաջնորդ, Հայաստանի առաջին նախագահ Լևոն Տեր-Պետրոսյանի հետ:
Համազեկուցողները իրենց փաստահավաք առաքելությունը կավարտեն հինգշաբթի օրը:
Ընդդիմադիր Հայ ազգային կոնգրեսը մտադիր է համազեկուցողների հետ հանդիպմանը բարձրացնել 2008 թվականի մարտի 1-ի սպանությունների չբացահայտման հարցը, ինչպես նաև արտահերթ ընտրությունների անհրաժեշտության խնդիրը:
2008-ի մարտի 1-ին զոհված Տիգրան Խաչատրյանի մայրը՝ Ալլա Հովհաննիսյանը «Ազատություն» ռադիոկայանին փոխանցել է, որ այս անգամ համազեկուցողների հետ հանդիպելու իրենց դիմումը մերժվել է:
«Մեր համար շատ անսպասելի էր այն, որ ԵԽԽՎ-ի գրասենյակից մեր դիմումին ի պատասխան տեղեկացանք, որ հանդիպումը չի կայանալու՝ այն պատճառով, որ համազեկուցողները շատ զբաղված են և նրանք մեկ օրով են եկել», – ասաց Ալլա Հովհաննիսյանը:
«Մենք համազեկուցողների հետ հանդիպում ենք պահանջում: Անաչառ զեկույց պատրաստելու համար նրանք պետք է մեզ լսեն», – հայտարարեց մարտի 1-ին զոհված երիտասարդի մայրը:
