Ինչպիսին կլինի Սահմանադրական հանրաքվեի ճակատագիրը, այսօր աշխույժ քննարկվող հարցերից մեկն է, սակայն մի հարցի հանրաքվեն արդեն իսկ տվել է միանգամայն հստակ և պարզ պատասխան: Խոսքը վերաբերում է Հայաստանում քաղաքական ընդդիմության հարցին կամ, ավելի շուտ՝ դրա բացակայության խնդրին: Հանրաքվեի գործընթացը շատ հստակ ի ցույց է դրել, որ Հայաստանում չկա քաղաքական ընդդիմություն, այդ բառի ոչ թե զուտ հռետորաբանական իմաստով՝ որ չկան իշխանությանը քննադատողներ, այլ բովանդակային, ինստիտուցիոնալ:
Հայաստանում չկա այդպիսի քաղաքական ընդդիմություն, և դրա հերթական տխուր դրսևորումն է այն, որ, երբ Հայաստանի շուրջ զարգանում է չափազանց նշանակալի քաղաքական միջազգային օրակարգ, երբ Մոսկվայում Թուրքիայի նախագահ Էրդողանն ու ՌԴ նախագահ Պուտինը փորձում են քննարկել բախտորոշ հարցեր, Հայաստանի խորհրդարանում ծավալվող քննարկումներից ամենամեծ ուշադրության ու աղմուկի է արժանանում խորհրդարանական մեծամասնության ու ընդդիմադիր կարգավիճակ ունեցող ուժերից մեկի փոխադարձ մեղադրանքները ՀՀԿ-ի հետ եղած կամ չեղած լինելու մասին:
Հայաստանում Սահմանադրական հանրաքվեն ցույց տվեց, որ Հայաստանում գործնականում չկա քաղաքական ինստիտուցիոնալ մրցակցություն, բովանդակային մրցակցություն: Լայն իմաստով, հանրաքվեն ցույց տվեց այն, ինչի մետաստազներին մենք ականատես ենք լինում տարբեր փոքր քաղաքական ձևաչափերում: Մյուս կողմից ակնառու է, որ ցույց տալով այդ խնդիրը առավել քան խոսուն կերպով, հանրաքվեն այդ խնդրի լուծումը ցույց չի տալու: Հանրաքվեն նոմինալ իմաստով կարող է լուծել ՍԴ դատարանակազմի հարցը: Իհարկե, դա իր հերթին նոր իրավիճակ է և մի շարք այլ հարցերում նոր լուծումների նախադրյալ, բայց այդ հարցերի շարքում չկա Հայաստանում քաղաքական համակարգի և մասնավորապես ընդդիմության խնդրի լուծումը: Որովհետև այդ հարցում որևէ նշանակություն չունի՝ Հրայր Թովմասյանն ու 6 դատավորները ՍԴ-ում են, թե ոչ: Միևնույն ժամանակ էլ, եթե Հայաստանում չի լուծվում բովանդակային, գաղափարական, արժեհամակարգային ընդդիմության, ըստ այդմ՝ քաղաքականապես թե՛ ներքին, թե՛ արտաքին իրողություններին ու մարտահրավերներին համարժեք ընդդիմության ձևավորման խնդիրը, մեծ հաշվով, ժամանակի ընթացքում կարող է նշանակություն չունենալ՝ ՍԴ դատարանակազմի խնդիրը լուծվել է, թե ոչ:
