Ֆուտզալի Հայաստանի ազգային հավաքականը Եվրո-2022-ի փլեյ-օֆում է։ Վաստակելով 4 միավոր մեր հավաքականը որակավորման փուլում B ենթախմբում զբաղեցրեց 2-րդ հորիզոնականը։ Առաջին տուրում Հայաստանի հավաքականը 2։5 հաշվով զիջել էր Բելգիային, այնուհետև 3։1 հաշվով առավելության հասել Չեռնոգորիայի ընտրանու նկատմամբ։
Վճռորոշ 3-րդ տուրում երկրորդ հորիզոնականն ապահովագրելու համար մերոնց անհրաժեշտ էր առավելության հասնել ենթախմբի ընդգծված ետնապահ Շոտլանդիայի նկատմամբ։ Այս հավաքականն առաջին տուրում Չեռնոգորիային 9։2 հաշվով զիջելուց հետո, երկրորդ տուրում 7։3 հաշվով զիջել էր Բելգիային։ Մեր հավաքականի հաղթանակը կասկած չէր հարուցում։ Բուքմեյքերները Հայաստանի հաղթանակի համար սահմանել էին 1․05 գործակից, բայց․․․։ Մեր ֆուտբոլիստները անսպասելիորեն ցուցադրեցին թույլ ֆուտբոլ։ Հաղթանակի նկատմամբ վստահությունն ուղղակի թույլ չտվեց Հայաստանի հավաքականին տրամադրվել և խաղալ գոնե իր հնարավորության սահմաններին մոտ։ Հանդիպումն ավարտվեց ոչ-ոքի 2։2։ Ընդ որում Շոտլանդացիները երկու անգամ առաջ անցան հաշվի մեջ և մերոնք հետապնդողի դերում էին։ Նշենք սակայն, որ ողջ հանդիպման ընթացքում Հայաստանի հավաքականը թելադրողի դերում էր, իսկ շոտլանդացիները կազմակերպեցին ընդամենը 5-6 վտանգավոր գրոհ որոնցից երկուսն ավարտվեց դարպասի գրավումով։ Ինչևէ, խաղալով արդար խաղի կանոններին համապատասխան՝ Հայաստան-Շոտլանդիա հանդիպումից հետո Բելգիայի ընտրանին, որն արդեն ապահովել էր առաջին հորիզոնականը 5։1 հաշվով հաղթեց Մոնտենեգրոյին Հայաստանի հավաքականի համար ապահովելով երկրորդ հորիզոնականը։ Նշենք, որ մեր ազգային թիմին երբևէ չէր հաջողվել դուրս գալ Եվրոպայի առաջնության եզրափակիչ փուլ կամ փլեյ-օֆ։ Ժամանակին ենթախմբում ընտրական մրցաշարը բաղկացած էր երկու խմբային փուլերից։ Մեր հավաքականը խաղացել էր խմբային երկրորդ փուլում, որտեղ հաջողության հասնել չէր հաջողվել։ Այո, Շոտլանդիային չհաղթեցինք, բայց մենք փլեյ-օֆում ենք։
Վիճակահանության արդյունքում առաջիկայում հայտնի կդառնա այլ ենթախմբերում երկրորդ այն հավաքականը, որի հետ տանը և դրսում հանդիպումների ձևաչափով կվիճարկենք Եվրո-2020-ի ուղեգիրը։ Փլեյ-օֆի հանդիպումները տեղի են ունենալու առաջիկա ապրիլին։
Ամփոփելով Հայաստանի հավաքականի մրցելույթը որակավորման փուլում, այն կարող ենք որակել լավ։ Մերոնք արժանի մրցավեճ անցկացրին Բելգիայի դեմ, փայլուն խաղով հաղթեցին Չեռնոգորիային։ Վճռորոշ պահին նյարդերը տեղի տվեցին և միավոր կորցրինք բավական թույլ մրցակցի դեմ խաղում։ Բայց սա ֆուտբոլ է։ Սխալներն ուղղելու համար ունենք ժամանակ։ Շնորհավորում ենք մեր հավաքականին պատմական արդյունք այնուամենայնիվ գրանցելու համար։
