«Առաջին լրատվական»-ի զրուցակիցն է քաղաքագետ Արկադի Վարդանյանը։
– Պարոն Վարդանյան, Հայաստանում է Ռուսաստանի ԱԳ նախարար Սերգեյ Լավրովը: Նա հանդիպել է վարչապետ Փաշինյանին, նաև արտգործնախարար Մնացականյանի հետ է ասուլիսով հանդես եկել։ Ի՞նչ նպատակ է հետապնդում այս այցելությունը՝ ըստ Ձեզ։
– Իրենք գիտեն, որ Մարտի 1-ից հետո շղթայաբար բացվելու է նաև Հոկտեմբերի 27-ի գործը։ Տեսան, որ Քոչարյանին ուժով բանտից չեն կարողանում հանել, հիմա փորձում են մեր իշխանությունների գլխի տակ փափուկ բարձ դնել, որ տեսնեն՝ հնարավո՞ր է արդյոք խոսել, պայմանավորվել, որ Հոկտեմբերի 27-ը չբացվի։ Այն պահից, որ իրենք սկսեցին այդ հանցագործ Քոչարյան կոչեցյալին պաշտպանել, արդեն հասկանալի էր, որ իրենց փորացավը բացառապես կենտրոնացած է այդ հարցի վրա։ Լավրովի այցը պատահական չէ, նա այն «լակոտներից» չէ, որ ուր ասես՝ գա, մեր ակադեմիկոսի ասած՝ ամեն քոսոտ երկիր։ Նա եթե գալիս է, ուրեմն հատուկ առաջադրանք ունի, որ պետք է կատարի։
– Ո՞րն է լինելու այդ առաջադրանքը։
– Բնականաբար ամեն բան կուլիսային մակարդակով կարվի, կխոսի Նիկոլ Փաշինյանի հետ ու կփորձի որքան հնարավոր է ծածկադմփոց անել, որ հանկարծ գործը չբացահայտվի։ Լավրովի այցելության նպատակը դա է, նա ոչ մի ուրիշ գործ չունի այստեղ անելու, դատարկաբանությունը պետք է օգտագործի, ասի՝ դարավոր բարեկամ ենք, ախպեր ենք, ընկեր. այդ բաժակաճառերը շատ ենք լսել։
– Այս այցելությանը նախորդեց Քոչարյանի՝ Ռուսաստանին հավատարմության երդում տվող հոդվածը, կարելի՞ է ասել, որ Լավրովն էլ իր հարցազրույցով, երբ խոսում է հայ-ռուսական հարաբերությունների դրական ընթացքի մասին, որոշակիորեն պատասխանում է Քոչարյանին՝ ցույց տալով, որ Մոսկվայից իրեն աջակցություն չի լինելու։
– Հարցն այն է, որ իրենք արդեն հասկացան, որ Քոչարյանին բանտից չեն կարողանա հանել, և արդեն մեկ այլ տարբերակ են փորձում։ Հիմա Քոչարյանն ինչ ասի, չասի՝ իրեն շան տեղ դնող չկա։ Ինքը կորած անձնավորություն է, ռուսների ասած՝ «խաղացած քարտ» է, ոչ մեկին հետաքրքիր չէ։ Լավրովի մակարդակը շատ բարձր է։ Իրենք հիմա տեսնում են, որ Հայաստանի հետ հնարավոր չէ նախկին տրամաբանությամբ խոսել ու մոտենալ, հիմա որոշել են դիվանագիտական խողովակներով փորձել խոսել ու պայմանավորվել։ Իրենց նպատակն այժմ միայն դա է՝ փորձել դուրս գալ Հոկտեմբերի 27-ի պատասխանատվությունից։ Այն, ինչ տեղի կունենա բացահայտումից հետո, ուղղակի աննախադեպ խայտառակություն է լինելու Ռուսաստանի համար։
