«Սասնա ծռեր» համահայկական կուսակցության քարտուղարության համակարգող Վարուժան Ավետիսյանն առաջարկում է կազմաքանդել Ազգային անվտանգության ծառայությունը և ստեղծել անվտանգության ազգային համակարգ: Նրա կարծիքով՝ ԱԱԾ արդեն նախկին ղեկավար Արթուր Վանեցյանի միջոցով Կրեմլը դավադրություն էր մշակել, այն է՝ տապալել ՀՀ վարչապետ Նիկոլ Փաշինյանին և անել ամեն ինչ, որ Վանեցյանը նշանակվեր վարչապետ ու երկիրը կառավարվեր Կրեմլից: Ավետիսյանի կարծիքով՝ ԱԱԾ որևէ ղեկավար ոչինչ չի կարող անել, նրանցից միայն պետք է ձերբազատվել, այսինքն՝ արգելքների միջոցով թույլ չտալ, որպեսզի իրենք մոտենան պետական համակարգին: «Պետությունը վարակված է, այն քաղցկեղից պետք է մաքրել»,- նշում է Ավետիսյանը:
«Առաջին լրատվական»-ի հարցին՝ արդյոք իրենց առաջարկը ներկայացրե՞լ են նաև կառավարությանը, Վարուժան Ավետիսյանը պարզաբանեց. «Պաշտոնապես, ուղիղ չենք ներկայացրել: Բայց օրեր առաջ գրավոր նույնաբովանդակ հայտարարություն ենք տարածել: Այսպես ասեմ՝ մենք գիտենք, որ այդ առաջարկությունն իրենց հասել է, իրենք այդ մասին գիտեն, տեղյակ են»:
Մեր հաջորդ հարցին՝ արդյոք ԱԱԾ-ի դավադրության ևս մի օրինա՞կ է այն փաստը, որ նախկին որոշ պաշտոնյաներ, որոնց դեմ կան հարուցված քրեական գործեր, այսօր գտնվում են արտերկրում և փաստացի սահմանը կարողացել են հատել հեղափոխությունից հետո, Ավետիսյանը պատասխանեց. «Միգուցե մեկ-երկուսը իրենց հասանելի միջոցներով են գնացել: Այսինքն՝ օգտվելով այն հանգամանքից, որ իշխանությունները հապաղում են, ճողոպրել են: Բայց ընդհանուր առմամբ՝ այո՛: Կոնկրետ որևէ անձի վերաբերյալ չենք կարող ասել՝ այս մեկն ինչ ճանապարհով է գնացել, բայց ընդհանուր պատկերին նայելով՝ այո՛, ակնհայտ է դառնում, որ նրանք ճամփու են դրվել»,- եզրափակեց մեր զրուցակիցը:
«Սասնա ծռերի» այս առաջարկը կիսում է Հայաստանի Եվրոպական կուսակցությունը: Կուսակցության նախագահ Տիգրան Խզմալյանն «Առաջին լրատվական»-ի հետ զրույցում ասաց. «Ես տարիներ շարունակ պնդում եմ, որ այն, ինչ մեզ մոտ կոչվում է ԱԱԾ, իրականում սովետական ԿԳԲ-ի ենաթաբաժին է և պետք է կազմալուծվի, հետախուզությունը կամ հակահետախուզությունը պետք է բաժանվեն ներքին գործերի ու պաշտպանության նախարարությունների հատուկ բաժինների միջև, իսկ ԱԱԾ-ի լավագույն կադրերը պետք է տեղափոխվեն համապատասխան հիմնարկներ՝ իրենց գործակալական ցանցով հանդերձ»:
Ըստ Խզմալյանի՝ ԱԱԾ-ն ԿԳԲ-ի ժառանգորդն է. «Եվ եթե մենք համեմատենք այլ երկրների հետ, կտեսնենք, որ սովետական ԿԳԲ-ի գործառույթը մեկն էր՝ ներքին թշնամիներ ստեղծել ու ոչնչացնել, դասակարգային պայքարի հիմնական գործիքն էր: Իսկ մեր երկրում մենք դասակարգային թշնամի չունենք, իրականում ԱԱԾ-ն շարունակում է ծառայել օտար պետությանը, և մինչ այսօր ԿԳԲ-ն անձնավորված կապեր ունի բոլոր աշխատակիցների հետ, ապահովում է նրանց թոշակն ու խրախուսանքը: ԱԱԾ-ն ռուսական հատուկ ծառայությունների տրոյական ձին է Հայաստանի մարմնի մեջ, այն պետք է ոչնչացվի, բարեփոխել հնարավոր չէ, ոչ մի լյուստրացիա չի փրկի»,- եզրափակեց Տիգրան Խզմալյանը:
