Ուկրաինայի նախագահ Վլադիմիր Զելենսկին պատմել է, թե ինչպես է իր ընտանիքը վերաբերվում իր նոր պարտականություններին և կարգավիճակին: Երկրի առաջին տիկինը շատ է հուզվում, պետության ղեկավարի դուստրն արդեն ընտելացել է, իսկ որդին շատ ուրախ է և բոլորին ասում է, որ ինքը նախագահի որդի է: Այս մասին Զելենսկին հայտնել է Facebook-ի իր էջում հրապարակված տեսանյութում:
«Առաջին տիկինը շատ է հուզվում, նա շատ բծախնդիր է, ամեն ինչին շատ լուրջ է վերաբերվում, և, հետևաբար, շատ հուզվում է: Աղջիկս արդեն հարմարվել է, սկզբում շատ էր հուզվում: Որդիս, ընդհանուր առմամբ, երջանիկ է, ասում է ես նախագահի որդի եմ: Մենք նրան ասացինք, որ չի կարելի նման բան ասել մարդկանց, ուստի հիմա ասում է. «Դուք ինքներդ գիտեք ում տղան եմ ես»,- ասել է Զելենսկին:
Ուկրաինայի նախագահը նաև պատմել է, թե ինչու է Օդեսայում կարմիր լողազգեստով հայտնվել լողափին: Նա ցանկանում է ավելի մոտ լինել ժողովրդին, հանգստանալ իր երկրում, և ոչ թե, այլ քաղաքական գործիչների նման, Մալդիվներում:
Նա նշել է, որ ոչ ոքի չի կարելի վստահել, որ ցանկանում է մնալ պատմության մեջ և որ հարգեն իր թիմին:
