Եթե նախապատրաստվող դավադրության վերաբերյալ լուրջ տվյալներ կան, Երևանը կարող է դրանք տրամադրել Մոսկվային։ Այս մասին «Առաջին լրատվական»-ի հետ զրույցում ասաց Պետդումայի՝ ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահ Լեոնիդ Կալաշնիկովը։
Նա հիշեցրեց, որ նախապատրաստվում է ՌԴ նախագահ Վլադիմիր Պուտինի պաշտոնական այցը Երևան։
«Պուտինին սիրում են Հայաստանում․ կարծում եմ, որ հանդիսություններից և ճոխ ընդունելությունից զատ երկկողմ կարևոր պայմանագրեր կկնքվեն Մոսկվայի և Երևանի միջև»,- ասաց նա։
Պատգամավորի խոսքով՝ «Ռուսաստանը ընդհանուր լեզու է գտել Հայաստանի ներկա իշխանությունների հետ»։
«Մոսկվան միշտ կողմնակից է եղել և շարունակում է պաշտպանել սահմանադրական և միջազգային իրավունքի նորմերի խստիվ պահպանումը քաղաքականության մեջ: Եթե նախապատրաստվող դավադրության մասին լուրջ տեղեկություններ կան, ապա Երևանը կարող է դրանք տրամադրել Մոսկվային:
Մեր երկրները դաշնակիցներ են, և մենք չենք կարող այլ կերպ վարվել, քան Հայաստանին օգնություն տրամադրելը ապօրինի գործողությունների և դավադրությունների դեպքում», – ասաց Կալաշնիկովը:
Հայաստանը կարիք ունի ներդրումների և տնտեսական զարգացման: Մոսկվան պատրաստ է խորացնել կոոպերացիան և համագործակցությունը, հավելեց պատգամավորը։