Օրերս Ալեքսանդր Սպենդիարյանի անվան օպերայի և բալետի ազգային ակադեմիական թատրոնի անձնակազմը հերթական անգամ անդրադարձավ մշակույթի նախարարի պաշտոնակատար Նազենի Ղարիբյանի հրամանին և դրանում ներկայացված կետերին՝ Կոնստանտին Օրբելյանին թատրոնի տնօրենի պաշտոնից ազատելու վերաբերյալ: Անձնակազմը պնդում է, որ վարչապետին ապատեղեկատվություն է ներկայացվել: Թեմայի շուրջ «Առաջին լրատվական»-ի հետ քննարկմանը մասնակցեցին Օպերայի և բալետի ազգային ակադեմիական թատրոնի դիրիժոր Հարություն Արզումանյանը և «Լուսավոր Հայաստան» խմբակցության պատգամավոր Աննա Կոստանյանը:
Նախարարության կողմից ներկայացված հիմնավորումներից մեկը Օպերայի և բալետի ազգային ակադեմիական թատրոնում 92մլն դրամի չափով չարաշահումների առկայությունն է, մինչդեռ Հ. Արզումանյանը պնդում է, որ դա սուտ տեղեկություն է, որով ցանկացել են, որ ազատման հրամանի հիմնավորումն ավելի հնչեղություն ստանա: «Ֆինանսական չարաշահումները եղել են մինչև Կ. Օրբելյանի նշանակումը, և դա փաստաթղթում նշված է, մշակույթի նախարարությունը լավ տեղյակ է այդ մասին, բայց միտումնավոր այդ փաստը ներկայացրել է վարչապետին՝ առանց նշելու չարաշահումների տարեթիվը»,- նշեց դիրիժորը:
Ա. Կոստանյանի խոսքով՝ Կ. Օրբելյանի նշանակումից ի վեր, կարճ ժամանակահատվածում տեղի են ունեցել շրջադարձային փոփոխություններ՝ խաղացանկում թարմություններ, պրեմիերաներ: «Չենք կարող չարձանագրել, որ դրական աշխատանքներ են իրականացվել, և ճիշտ չէ այսպես հապճեպ որոշում կայացնել և Կ. Օրբելյանին ազատել տնօրենի պաշտոնից: Կարծում եմ՝ ինֆորմացիայի պակաս կա: Երբ պարոն Փաշինյանին այս առնչությամբ հարց ուղղեցի, նրա արձագանքն ուսումնասիրելիս հասկացա, որ նրան լիարժեք ինֆորմացիա չի ներկայացվել»,- նշեց պատգամավորը:
Վարչապետի հետ հանդիպումից անմիջապես հետո թատրոնի անձնակազմը մոտ 12 էջանոց հակափաստարկների փաստաթուղթ է ներկայացրել նրան՝ ի հակադրումն նախարարության փաստարկների:
Հ. Արզումանյանն ընդգծեց, որ գոյություն ունի կապ նախարարության և Օրբելյանին սևացնող աշխատակիցների միջև:
Մանրամասն՝ տեսանյութում:
