Դավիթ Սանասարյանը Պետական վերահսկողական ծառայության ղեկավար է նշանակվել ՀՀ վարչապետ Նիկոլ Փաշինյանը մայիսի 21-ի որոշմամբ: Այս մասին հայտնում է iravaban.net-ը։
Նրա լիազորություններն այժմ կասեցվել են: Նրան մեղադրանք է առաջադրված ՀՀ քրեական օրենսգրքի 308-րդ հոդվածի 1-ին մասի հատկանիշներով (պաշտոնեական լիազորությունները չարաշահելը):
2018 թվականի հունիսի 21-ին Դավիթ Սանասարյանը Բարձրաստիճան պաշտոնատար անձանց էթիկայի հանձնաժողովին ներկայացրել է պաշտոնը ստանձնելու հայտարարագիրը, որում ոչինչ նշված չէր:
2019 թվականի փետրվարի 6-ին նա ներկայացրել է տարեկան հայտարարագիրը, որի համաձայն՝ հարկային տարվա վերջում նրա դրամական միջոցները կազմել են 917 հազար 530 դրամ:
Դավիթ Սանասարյանի եկամուտները հարկային տարում կազմել են 6 միլիոն 172 հազար 630 դրամ, որը ստացվել է աշխատավարձից:
Նրա կնոջ՝ Սոնա Հովհաննիսյանի 2018 թվականի տարեկան հայտարարագրի համաձայն՝ հարկային տարվա վերջում․
- դրամական միջոցները կազմել են 50 հազար դրամ,
- եկամուտները՝ 5 միլիոն 132 հազար 36 դրամ, որը ստացվել է երկու աղբյուրից՝ աշխատավարձից (3,132,036 դրամ) և ստացված փոխառությունից (2,000,000 դրամ):
Ներկայացված են նաև Դավիթ Սանասարյանի որդիների՝ Արեգի և Տարոնի հայտարարագրերը, որոնցում ոչինչ նշված չէ:
Դավիթ Սանասարյանի հետ համատեղ բնակվում են նաև Լարիսա Մխեյանը և Տարոն Սանասարյանը: Վերջինիս հայտարարագրում ոչինչ նշված չէ, իսկ Լարիսա Մխեյանի եկամուտները 2018 թվականին կազմել են 1 միլիոն 687 հազար դրամ, որը ստացվել է 2 աղբյուրից՝ աշխատավարձից և կենսաթոշակից:
