Ավստրալիայի Բրիսբեն քաղաքի բնակիչն իր ընկերուհուն առաջարկություն է արել Մեծ պատնեշի խութում՝ դայվինգով զբաղվելու ժամանակ, հաղորդում է Daily Mail-ը:
Ինչպես հաղորդվում է, զույգը խմբի հետ սուզվել է Ֆլին խութի մոտակայքում, անցած շաբաթ: Մի պահի հրահանգիչը Ջոշ Թոմփսոնին է փոխանցել նախապես պատրաստված մատանին: Այնուհետև երիտասարդը կանչել է ընկերուհուն՝ Դեմիկա Գիլռոյին և առաջարկություն արել նրան. ցույց է տվել հարցով գրությունը և մատանին դրել նրա մատին: Աղջիկը համաձայնել է և գրկել նրան:
Նշվում է, որ զույգն արդեն երկու տարի միասին է, իսկ ծանոթ են դեռ դպրոցից: Թոմփսոնը Գիլռոյին զգուշացրել է 2020-ին նրան առաջարկություն անելու իր մտադրության մասին: Այնուամենայնիվ, նա որոշել է անակնկալն ավելի վաղ մատուցել՝ աղջկա ծննդյան օրվա կապակցությամբ ճամփորդության ժամանակ:
Թոմփսոնը նշել է, որ նա ամենառոմանտիկ անձնավորությունը չէ, սակայն որոշել է այդ օրը անմոռաց դարձնել ընկերուհու համար: Նա հավելել է, որ հարսանիքը նախատեսում են նոյեմբերին կամ 2020-ի գարնանը:
