Грузия Online-ի փոխանցմամբ, Վրաստանի Լեյբորիստական կուսակցությունը դավաճանություն է որակել Վրաստանի կողմից Աբխազիայի անկախության ճանաչման գաղափարը։ Այս մասին այսօր կայացած մամլո ասուլիսում հայտարարել է կուսակցության գլխավոր քարտուղար Սոսո Շատբերաշվիլին.
«Դա դավաճան և հանցավոր գաղափար է և լիովին համադրելի է հակամարտային շրջանների խնդիրներից ձերբազատվելու վերաբերյալ Միխեիլ Սաակաշվիլիի ռազմավարությանը։ Վրաստանը սկսել է Աբխազիան կորցնել դեռևս Էդուարդ Շևարդնաձեի ժամանակ, և այդ գործը շարունակել է նրա «հոգեզավակ» Միխեիլ Սաակաշվիլին։ Վրաստանի պատմության ընթացքում Էդուարդ Շևարդնաձեն խաղացել է աղետալի դեր՝ կորցնելով Աբխազիան։
Նա սկսել է վրացական հասարակությանը գաղափարապես նախապատրաստել նրան, որ վաղ թե ուշ պետք է ճանաչել Աբխազիայի անկախությունը, և այդ ջանքերի առաջին արդյունքը փորձագետ Մամուկա Արեշիձեի գաղափարն է։ Վրաստանն առանց Աբխազիայի պատկերացնելը նույնն է, ինչ Վրաստանն առանց Թբիլիսիի պատկերացնելը։ Յուրաքանչյուրի մոտ եթե հղանա այդ գաղափարը, ապա նա դավաճան է»։
Հիշեցնենք, որ երեկ Վրաստանի նախկին նախագահ Էդուարդ Շևարդնաձեն «Ասավալ-դասավալի» թերթին տված հարցազրույցում խելամիտ է անվանել Կովկասի հարցերով վրացի փորձագետ Մամուկա Արեշիձեի՝ Աբխազիայի անկախության ճանաչման առաջարկը։
Մամուկա Արեշիձեն իր գաղափարը պատճառաբանել էր նրանով, որ պաշտոնական Թբիլիսին պետք է Աբխազիայի նկատմամբ այնպիսի քայլեր իրականացնի, որոնք Աբխազիային կհեռացնեն Ռուսաստանից.
«Աբխազիայում տիրող իրավիճակը լավատեսության ոչ մի հիմք չի տալիս։ Աբխազները գտնվում են Աբխազիայից վտարվելու և անհետանալու վտանգի տակ։ Աբխազներին պետք է փրկել ձուլումից։ Մենք պետք է հատուկ միջոցներ ձեռնարկենք ոչ թե Աբխազիան, այլ աբխազներին վերադարձնելու ուղղությամբ՝ ծայրահեղ դեպքում նրա համար, որպեսզի կանգնեցնենք նրանց ասիմիլացումը հենց Աբխազիայի տարածքում։
Վրաստանը պետք է Աբխազիայի անկախությունը ճանաչի որոշակի նախապայմաններով, ինչպիսին է, ասենք, փախստականների վերադարձը։ Մենք պետք է այնպիսի անսպասելի քայլ կատարենք, որը կզինաթափի մրցակցին, այսինքն՝ որոշակի սեպ կխրի նրա և աբխազների միջև։ Եթե ինձանից կախված լիներ, ապա ես հենց այսօր անկախություն կտրամադրեի Աբխազիային»,- նշել է Արեշիձեն։
