Եվրամիությունը պատրաստ է համագործակցել Ադրբեջանի հետ բոլոր մակարդակներում, սակայն Բաքվի կառավարությունը պետք է հարգի քաղաքացիների հիմնարար իրավունքները և ընտրական օրենսդրությունը համապատասխանեցնի այդ պահանջներին: Ինչպես հաղորդում է contact.az-ը, այս մասին Բրյուսելում հայտարարել է ԵՄ ընլայնման և հարևանության քաղաքականության հարցերով գերագույն հանձնակատար Շտեֆան Ֆյուլեն Ադրբեջանի և ԵՄ-ի միջև համագործակցության խորհրդի նիստի ավարտից հետո:
«Վիլնյուսում ստորագրվել է այցագրի ռեժիմի դյուրացման համաձայնագիր, և մենք ցանկանում ենք նման համագործակցություն բոլոր մակարդակներում: Ասոցացման մասին համաձայնագրի և Ռազմավարական գործընկերության վերաբերյալ բանակցությունները շարունակվում են»,- ասել է Ֆյուլեն:
Նա նաև Ադրբեջանին կոչ է արել ինտենսիվացնել Առևտրի համաշխարհային կազմակերպությանն անդամակցելուն ուղղված աշխատանքները, ինչն առևտրային կապերի առաջխաղացման և ազատ առևտրի գոտու ստեղծման նախապայման է:
Միևնույն ժամանակ Ֆյուլեն ընդգծել է, որ հիմնական ազատությունները շարունակում են մնալ Ադրբեջանի և ԵՄ-ի միջև հարաբերությունների հիմնական տարրերը:
«Մենք Ադրբեջանին կոչ ենք անում հարգել սեփական միջազգային պարտավորությունները տվյալ հարցում: Շատ բան պետք է անել այնպիսի ոլորտներում, ինչպիսք են ԶԼՄ-ների, հանրահավաքների ազատությունը»,- ընդգծել է եվրահանձնակատարը:
Ֆյուլեի խոսքով՝ Ադրբեջանը մեծ աշխատանք պետք է կատարի կոռուպցիայի դեմ պայքարում, իսկ ընտրական օրենսդրությունը համապատասխանեցնի ԵԱՀԿ /ԺՄԻԳ-ի պահանջներին:
