«Հոգևոր Հայաստան»-ը յուրատեսակ զանգակատուն է, որը պարբերաբար հնչեցնում է այն խնդիրները, որոնք հայ ժողովրդի ներկայիս օրակարգի կարևորագույն խնդիրները կարող են հանդիսանալ։ Այդ մասին «Առաջին լրատվական»-ի հետ զրույցում նշեց աստվածաբան, «Հոգևոր Հայաստան» նախաձեռնության անդամ Վարդան Խաչատրյանը։
Նրա խոսքերով՝ այս տեսակետից «Հոգևոր Հայաստան»-ի համար կարևորագույն խնդիրը հասարակական ներդաշնակության ձևավորումն է, որի դեպքում միայն պատկերացնելի է, որ հայ ժողովրդի ընթացքը դեպի քաղաքակրթական ծավալման, մարդկության պատմության հաջորդ փուլ կարող է ամփոփված լինել։
Հարցին, թե ինչպես է վերաբերվում Ազատության հրապարակում ծավալվող իրադարձություններին, որոնք ուղղված են կանխելու Սերժ Սարգսյանի վերարտադրությունը, Վարդան Խաչատրյանը պատասխանեց. «Մենք բոլորս մեզ հաշիվ ենք տալիս այն առումով, որ ներկայիս աշխարհը ընթանում է դեպի նոր որակի աշխարհի ձևավորում, որի պայմաններում մենք ունենք գերխնդիր՝ ապահովել հայ ժողովրդի առհավատչյան։ Այս տեսակետից, իհարկե, «Հոգևոր Հայաստան»-ի խնդիրը քաղաքական, կիրառական պայքարը չէ, այլ գոյություն ունեցող իրավիճակի մաքսիմալ խորհրդակցական առումով ներդաշնակության բերելը»։
Դիտարկմանը, թե «Հոգևոր Հայաստան»-ը չի՞ պատրաստվում միավորվել այն օրակարգի շուրջ, որը ձևավորվել է Ազատության հրապարակում, Վարդան Խաչատրյանը արձագանքեց. «Ինձ համար զարմանալի է, որ ասում եք՝ ձևավորվել է օրակարգ։ Իմ խորին համոզմամբ՝ օրակարգ կարող է ձևավորվել միայն կիրառական ընթացքի դեպքում։ Այդ առումով մեզ համար կարևորագույն խնդիր է, որ գոյություն ունեցող բավականին նեգատիվ իրավիճակները հնարավոր լինի հաղթահարել։ Խոսքը վերաբերում է ընդդիմադիր դաշտի վիճակին, որը հատվածայնացված է բավականին»։
Ամբողջությամբ՝ տեսանյութում։