Թուրքական Vatan թերթի փոխանցմամբ, երեկ կայացել է «Էրգենեկոն 2»-ի գործով հերթական դատալսումը, ուր հարցաքննվել են թուրքական ոստիկանության հատուկ գնդի նախկին հրամանատարներ Իբրահիմ Շահինն ու Սերվեթ Քայնաքը։ Վերջինիս անունն ընդգրկված է եղել S1 անունը կրող խմբի մեջ, որն էլ Շահինի հրահանգով պետք է մահափորձեր իրականացներ հայերի ու ալևիների դեմ։
Դատարանում Քայնաքին հարցրել են, թե ինչ պայմաններում է ծանոթացել Պոլսո հայոց պատրիարք Մեսրոպ Բ Մութաֆյանին, ինչին ի պատասխան՝ Քայնաքը նշել է. «Հրանտ Դինքի սպանությունից հետո հայկական եկեղեցիներում տեղի ունեցած պատարագների ժամանակ մենք ապահովել ենք դրանց անվտանգությունը։ Այդ անվտանգության հաճախակի միջոցառումներն անհանգստացնում էին յուրաքանչյուրին։ Այդ գործընթացում մենք ներգրավել էինք նաև քաղաքացիական հագուստով ոստիկանների։
Մի անգամ էլ պատարագից հետո մենք ճաշեցինք հայ հոգևորականների հետ, որից հետո պատրիարք Մութաֆյանն այցելեց Բեյօղլուում գտնվող հայկական գերեզմանոց, ես էլ ստանձնեցի նրա թիկնապահի դերը»։
Հիշեցնենք, որ երեկ էլ Ստամբուլի 13-րդ ծանր հանցագործությունների դատարանում ցուցմունքներ է տվել Իբրահին Շահինը, որը «հերքել» է, թե թշնամաբար է տրամադրված եղել պատրիարքի դեմ. «Այդպիսի բան չկա։ Ես տարբեր թերթերից պարբերություններ էի հանում, որպեսզի գիրք գրեի: Այդ նյութերը կապված էին իմ գրքի հետ»։
Հարկ է նշել, որ Իբրահիմ Շահինի ձերբակալությունից հետո ոստիկանությունը խուզարկել էր նրա տունը և հայտնաբերել ահաբեկումների մի շարք պլաններ, որոնց թվում էին ոչ միայն Պոլսո հայոց պատրիարքի, այլև Սըվազի հայերի կրոնական առաջնորդ Մինաս Դուրմազգյուլերի, ալևիների ֆեդերացիայի նախագահ Ալի Բալքըզի մահափորձերը, ինչպես նաև Անկարայի առևտրի կենտրոնի պայթեցումը։
