Հունաստանի արտգործնախարար Նիկոս Կոտզիասը հոկտեմբերի 24-ին Թուրքիա կատարած այցի ժամանակ Թուրքիայի նախագահ Ռեջեփ Թայիփ Էրդողանին հրավիրել է Հունաստան, այցը կկայանա նոյեմբերի վերջին կամ դեկտեմբերի սկզբին։ Այս մասին Կոտզիասը հայտարարել է մամլո ասուլիսի ժամանակ, հայտնում է RIA Novosti-ն։
«Մենք պայմանավորվել ենք, որ Թուրքիայի նախագահը Հունաստան կայցելի։ Ես հանդիպմանը հրավեր եմ փոխանցել, և Էրդողանն այն ընդունել է։ Աթենքում բանակցություններ կանցկացվեն նախագահ Պրոկոպիս Պավլոպուլոսի և վարչապետ Ալեքսիս Ցիպրասի հետ։ Հստակ ամսաթիվը դեռևս հայտնի չէ»,-ասել է Կոտզիասը։
Նրա խոսքով՝ Թուրքիայի հետ կան քաղաքական խնդիրներ, որոնց Անկարան արձագանքում է նևրոտիկ կերպով, սակայն այդ խնդիրները պետք է լուծել։
«Աստված, կամ Ալլահը սահմանել է, որ մեր երկու երկրները հարևաններ լինեն։ Մենք տարբեր կարծիքներ ունենք բազմաթիվ հարցերով, սակայն մենք պետք է տեսակետներ փոխանակենք։ Մենք բացում ենք քննարկման ուղիները»,-ասել է նախարարը։
Հունաստանի արտգործնախարարի խոսքով՝ Թուրքիա կատարած այցի ժամանակ ինքը քննարկել է քրիստոնյա բնակչության և կրոնական կրթության խնդիրները։
