«Շատ հաճախ Երևանի քաղաքապետարանը, երբ որ վարչական տույժ նշանակելու մասին որոշում է կայացնում, վարորդներին նույնիսկ չի էլ ծանուցում այդ որոշումների մասին, այլ նրանց մեջքի հետևում դա ուղարկում է ԴԱՀԿ, իսկ ԴԱՀԿ-ն էլ կուրորեն դա միանգամից կատարում է, անգամ չի էլ ստուգում՝ արդյո՞ք բավարար հիմքեր կան վարորդին տուգանելու համար, թե՞ ոչ։ Այս զույգը շատ լավ, մտածված գործում է ընդդեմ քաղաքացիների․ դա ոչ տեխնիկական սխալ է, ոչ վրիպակ, ոչ էլ անփութություն։ Մի շարք օրինակներով մենք բազմիցս ապացուցել ենք, որ ակտը դեռ անբողոքարկելի չդարձած, այսինքն՝ գործը դեռ դատարնում է, վարույթը դեռ չի ավարտվել, և դատարանի վերջնական վճիռ չկա առ այն, թե այդ ակտը վարորդը պետք է մուծի, թե ջրվի, բայց ԴԱՀԿ-ն արգելանքի մասին որոշում է ներկայացնում, հաշիվները կալանքի տակ է վերցնում և համարձակվում է քաղաքացու հաշվի վրայից գումարները քաշել։ Այս ամենի մեղավորը և՛ Երևանի քաղաքապետարանն է, և՛ ԴԱՀԿ-ն»,- «Առաջին լրատվական»-ի հետ զրույցում շեշտեց Գիտությունների ազգային ակադեմիայի իրավագետ Տիգրան Սարգսյանը։
Վերջինիս խոսքերով՝ բազմաթիվ դեպքեր հիմնավոր ձևով վկայում են այն մասին, որ Երևանի քաղաքապետարանն ու ԴԱՀԿ-ն վարորդներից փողը գողանալու, օրինական ճանապարհով ռեկետ անելու համակարգ են աշխատեցնում։
«Քաղաքապետարանում որքան էլ որ ծանոթ-բարեկամով անգրագետների ընդունած լինեն աշխատանքի, բայց մեջները, կարծում եմ, խելքը գլխին մարդիկ կան ու այդ խելացի մարդիկ, որոնք որ քաղաքապետարանում եզակի թիվ են կազմում, շատ ուսումնասիրություններ են կատարել, որոնցից մեկն էլ մասսաները ղեկավարելու նախագծերն են, օրինակ, 100 հազար հոգու տուգանի, դրանցից 1000 հոգին գլխի կընկնի, որ այդ տուգանքը սխալ է, դրանցից 100 հոգին կպայքարի իրենց իրավունքների համար, իսկ 100-ից 10-ին էլ թույլ տանք, որ դատարանում հաղթեն, որպեսզի հետո դրա անունը դնեն, թե դեմոկրատիա կա, որ իբրև տեսեք մենք պարտվել ենք ու ընդունում ենք մեր մեղավորությունը, բայց իրականում դու շահած դուրս կգաս 99 հազար 900 անգամ։ Այսինքն՝ մասսաներին հարիֆացնելու, խաբելու համակարգեր են աշխատեցնում»,- շեշտեց իրավագետը։
Զրույցի ընթացքում անդրադարձանք նաև այս կառույցների մի շարք այլ «ապօրինի գործողություններին», «Փարկինգ Սիթի Սերվիս» ընկերության գործունեությանը, ինչպես նաև տվյալ խնդիրները բարձրաձայնելու համար Տիգրան Սարգսյանի նկատմամբ որոշ մարդկանց կողմից անձնական հաշվեհարդար տեսնելու փորձին։
Մանրամասները՝ տեսանյութում։
