Ժամը 14-ին, երբ կիսվել է ընտրական օրը, Երևանի ընտրություններում քվեարկել է 210 903 քաղաքացի, որը կազմում է ընտրողների 25.04 տոկոսը: Եթե մասնակցության այս միտումը պահպանվի, ապա օրվա ավարտին ավագանու ընտրությունների մասնակցությունը կլինի մոտ 50%, ինչը կանխատեսվում էր փորձագիտական անալիզներով:
Մյուս կողմից` նույնիսկ ընտրությունների մասնակցության այս պահի ցուցանիշը և կանխատեսվող տոկոսը փոքր-ինչ անբնական են: Ասել կուզենք, որ հասարակության անգամ հարաբերական ակտիվությունը վիճահարույց է, եթե հաշվի առնենք օբյեկտիվ մի քանի հանգամանքներ: Գլոբալ առումով` քաղաքացիները հասկանում են, որ այս ընտրություններն իրենց կյանքում ոչինչ չեն փոխելու, որովհետև, մեծ հաշվով, դրանց արդյունքները տեղական նշանակություն ունեն և չեն կարող ազդել երկրում իրականացվող քաղաքականության վրա:
Մյուս կողմից` սրանք «հոգնած» ընտրություններ են` այն առումով, որ անմիջապես հաջորդում են համապետական ընտրություններին ու նաև սահմանափակ է քաղաքացիների ընտրության հնարավորությունը: Պակաս կարևոր չեն այն հանգամանքները, որ Երևանի ընտրությունների ելքն, ըստ էության, կանխորոշված է, և քչերն են (նույնիսկ` դժգոհ հասարակությունը) հավատում ընդդիմության հաղթանակին:
Ժամը 14-ի տվյալներն ընդդիմությանն ավելի շատ պետք է հիասթափեցնեն: Ընտրություններին ակտիվ մասնակցություն է գրանցվում Ավանում` 36,01%, ինչը զգալիորեն բարձր է երևանյան ցուցանիշից: Սա առնվազն ենթադրում է, որ Տարոն Մարգարյանի թիմը, հատկապես` քաղաքապետի թաղամասում, մաքսիմում արդյունավետ է օգտագործում իր վարչական և բիզնես ռեսուրսները: Լրիվ հակառակ պատկերն է Կենտրոն և Արաբկիր համայնքներում, որոնցում խորհրդարանական ընտրությունների ժանանակ ուժեղ են եղել «Ելք»-ի դիրքերը: Ժամը 14-ին Կենտրոնում քվեարկության է եկել ընտրողների 21,61%, իսկ Արաբկիրում` 22,50%-ը:
Այսինքն, այս համայնքներում մասնակցությունը պասիվ է երևանյան ընդհանուր ցուցանիշների ֆոնին: Սա նշանակում է, որ քաղաքականապես ակտիվ մարդիկ` կամ կանխատեսելի են համարում ընտրությունների արդյունքները և անիմաստ իրենց մասնակցությունը, կամ էլ` հիասթափված են ընդդիմության քարոզարշավից:
Ի դեպ, ընթացող ընտրությունների ապաքաղաքական բնույթը բացահայտվում է` դրանց կոմպակտ բնակեցված և, ըստ էության, քաղաքային մշակույթի մաս չկազմող Նորք Մարաշ և Նուբարաշեն վարչական շրջանների ընտրողների ակտիվ մասնակցությամբ` համապատասխանաբար 30,21 և 31,26%: Այս վարչական շրջաններում անիմաստ է խոսել քաղաքական գործոնների և ընդդիմության վերահսկողության մասին: Ընտրակաշառքն, անկախ ընդդիմության պնդումներից և իշխանության հերքումներից, մեծ տեղ ունի նաև այս ընտրություններում: Ժամը 14-ի դրությամբ` քաղաքային ընդհանուր պատկերում, իր մասնակցությամբ, «գերազանցիկ» է նաև աղքատացած ու լյումպենացված Շենգավիթը( 29,97%):
Լուսանկարը՝ Panorama.am-ի
