Հայաստանի նախագահ Սերժ Սարգսյանի կտրուկ շրջադարձը ազատ ընտրություն չէր: Այդ մասին հայտարարել է «Հայաստանի եվրոպական բարեկամներ» կազմակերպության ղեկավար Մայքլ Քամբեքը՝ մեկնաբանելով Հայաստանի որոշումը Մաքսային միությանը անդամակցելու մասին: Նա հորդորել է ԵՄ-ին Հայաստանի հետ աշխատանքի նոր մեթոդներ գտնել, որն ակնհայտորեն ցանկանում է սերտորեն համագործակցել ԵՄ հետ, սակայն, հավանաբար, դրան խոչընդոտում է երրորդ երկիրը: Այս մասին հայտնում է PanARMENIAN.Net–ը՝ հղում անելով European Voice-ին:
Սեպտեմբերի 3-ին Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարեց Մաքսային միությանը միանալու և հետագայում ԵվրաԱզԷՍ-ի ձևավորմանը մասնակցելու իր ցանկության մասին: Ռուսաստանի նախագահ Վլադիմիր Պուտինը հավանություն է տվել նախաձեռնությանը՝ պատրաստակամություն հայտնելով աջակցել այդ գործընթացին: Պուտինը հավելել է, որ ՌԵՈւ-ն կարող է մոտ 15 մլրդ ռուբլի ներդնել Հայաստանի երկաթուղային ցանցի զարգացման մեջ:
Մաքսային միությունն իր աշխատանքը սկսել է 2010 թվականին: Սկզբում միությանը անդամկցում էին Ռուսաստանը, Բելառուսն ու Ղազախստանը: Հետագայում միությանն անդամակցելու մտադրության մասին հայտարարեցին նաև Ղրղզստանն ու Տաջիկստանը:
2008թ. փետրվարի 13-ին Հայաստանի երկաթուղին հանձնվեց «Ռուսական երկաթուղի» ՓԲԸ-ին՝ հավատարմագրային կառավարման 30 տարի ժամկետով՝ այն 10 տարով երկարացնելու իրավունքով: Այդ նպատակով երկրում ստեղծվեց «Հարավկովկասյան երկաթուղի» դուստր ձեռնարկությունը:
