Վիետնամն աշխարհում առաջին տեղն է զբաղեցրել տեղի բնակչության շրջանում հարուստների թվի ավելացման ցուցանիշով: Այս եզրակացությունն են արել Knight Frank հեղինակավոր միջազգային կոնսալթինգային խմբի փորձագետները՝ ամփոփելով անցկացված հետազոտության արդյունքները, որը նվիրված էր աշխարհի երկրներում բնակչության բարեկեցության աճին:
Հետազոտողների հավաքած տվյալների համաձայն՝ 2010-ից մինչև 2016 թվականն ընկած ժամանակաշրջանում Վիետնամում գերհարուստների թվաքանակն աճել է 320 տոկոսով: Այս ցուցանիշով Վիետնամը տոկոսային հարաբերությամբ արդեն առաջ է անցել Հնդկաստանից և Չինաստանից, որոնք նույն այդ տարիներին հարուստների թվի աճ են արձանագրել 290 տոկոսով և 281 տոկոսով՝ համապատասխանաբար:
Որպես իրենց վարկանիշների հիմք՝ Մեծ Բրիտանիայում բազավորված խումբը վերցնում է UHNWI (Ultra High Net Worth Individuals` շատ խոշոր կապիտալով մասնավոր անձինք) կատեգորիան. սա մոլորակի առավել հարուստ և դրա հետ մեկտեղ տնտեսապես ակտիվ մասնավոր անձանց խավն է:
UHNWI-ի ցուցակում գրանցվելու հավակնորդները պետք է ունենան առնվազն 30 մլն դոլարի չափով ազատ շրջանառու ֆինանսական միջոցներ՝ չհաշված նրանց պատկանող շարժական կամ անշարժ գույքը:
Knight Frank-ը Վիետնամում նրանց թվին ներկայում դասում է 200 մարդու՝ միաժամանակ կանխատեսելով, որ հաջորդ տասնամյակների ընթացքում գերհարուստների թվաքանակն այստեղ կավելանա ևս 170 տոկոսով և կհասնի 540-ի նշագծին: Իսկ ինչ վերաբերում է «հասարակ միլիոնատերերին», որոնց տնօրինած ակտիվներն իրենց տերերին չեն ապահովում UHNWI-ի վարկանիշի հորիզոնականները, ապա այդպիսիք Վիետնամում, կոնսալթինգային խմբի գնահատումներով, այժմ հաշվում են մոտավորապես 14,5 հազար, իսկ մինչև 2026 թվականը նրանց թիվը կգերազանցի 38 հազարը:
Չնայած այն բանին, որ երկրում բնակչության մեկ շնչին ընկնող տարեկան միջին եկամուտը կազմում Է մոտավորապես 2 հազար դոլար, երեք տասնամյակ այստեղ անցկացվող նորացման քաղաքականության ընթացքում Վիետնամում ձևավորվել Է հարուստ «նոր վիետնամցիների» դաս: Վիետնամցի նորահարուստներն իրենց կարողությունը «կուտակում են» տարբեր ձևերով: Ունևոր վիետնամցիների շրջանում առավել հաճախ են հանդիպում նրանք, ում բիզնեսը կապված է ֆոնդային շուկայի, ծովամթերքի արտադրության և մշակման, ինչպես նաև շինարարության և անշարժ գույքի հետ՝ հաղորդում է tass.ru-ն :
