Ադրբեջանի նախագահ Իլհամ Ալիևը, ելույթ ունենալով քննարկմանը, որը Մյունխենյան անվտանգության համաժողովի շրջանակում նվիրված է եղել Եվրասիայում համագործակցության և խնդիրների թեմային, հայտարարել է, որ ղարաբաղյան հակամարտությունը վտանգ է ներկայացնում ողջ տարածաշրջանի համար։ Այս մասին փոխանցում է RIA Novosti-ն։
«Հայաստանի և Ադրբեջանի միջև հակամարտությունը վտանգ է ներկայացնում ողջ տարածաշրջանի համար։ Մեր կառուցողական դիրքորոշումը հիմնված է խաղաղ ճանապարհով հակամարտության շուտափույթ կարգավորման վրա՝ ՄԱԿ-ի բանաձևերի կատարման հիմքով»,-Ալիևի խոսքերն է մեջբերում նրա մամլո ծառայությունը։
Պատասխանելով Լեռնային Ղարաբաղի խնդրի կարգավորման հարցում Ռուսաստանի դերի մասին հարցին՝ Իլհամ Ալիևը նշել է, որ ԵԱՀԿ Մինսկի խմբի համանախագահ երկրներ Ռուսաստանը, ԱՄՆ-ն, Ֆրանսիան «պետք է ճնշում գործադրեն Հայաստանի վրա»: «Անհրաժեշտ է վերացնել այդ երկակի չափորոշիչները»,-ասել է Ալիևը։ Բոլոր հակամարտությունների կարգավորումը պետք է հիմնվի միասնական մոտեցման վրա, «չի կարելի թույլ տալ երկրների տարածքային ամբողջականության խախտում»՝ նշել է նա։