«Առաջին լրատվական»-ի զրուցակիցն է ՍԴՀԿ Ֆրանսիայի վարչության ատենապետ Գևորգ Սաչլյանը: Մեկ շաբաթ առաջ Սոցիալ-դեմոկրատ հնչակյան կուսակցության ատենապետ Նարեկ Գալստյանը մեզ հետ զրույցում նշեց, որ հանդիպել են Գագիկ Ծառուկյանին և միանում են նրա նախաձեռնած լայն դաշինքին:
– Պարոն Սաչլյան, առաջիկա խորհրդարանական ընտրություններին ՍԴՀԿ-ն կմասնակցի «Ծառուկյան» դաշինքով: Արդյոք Ֆրանսիայի Ձեր վարչությունը խնդիր չի՞ տեսնում ընտրություններին մասնակցելու այս ձևաչափի հետ կապված:
– ՍԴՀԿ-ն, լինելով քաղաքական ուժ, նպատակ ունի ժողովրդին առաջարկել ընկերային և հասարակական ծրագրեր: Եվ ուրեմն շատ բնական եմ համարում ՍԴՀԿ-ի մասնակցությունը երկրի քաղաքական կյանքում ընտրական գործընթացների միջոցով: Ինչ վերաբերում է Գագիկ Ծառուկյանի լայն դաշինքին, անշուշտ, դեռևս ՍԴՀԿ-ի հետ բանակցությունների փուլում են, բայց կարծում եմ, որ այն դաշինքը, որը պատրաստ է ընդունել ՍԴՀԿ-ի գաղափարախոսությունը և ծրագրերը, որոնք վերաբերում են ընկերային առաջարկներին, ընդունելի և ողջունելի է: Իսկ թե ինչ վերջնական տեսք կունենա այդ դաշինքը՝ անշուշտ, կտեսնենք առաջիկայում:
– ՍԴՀԿ-ն, օրինակ, 2008-ին ընդդիմություն էր, մարտի 1-ին ժողովրդի կողքին էր մինչև 2010 թվականը: Նախկին քաղաքական կուրսից 180 աստիճան շրջադարձային չե՞ք համարում այս դաշինքը:
– Կուսակցությունն ունի իր ծրագրերը, որոնք առաջարկում է, իսկ այն քաղաքական ուժերը կամ դաշինքները, որոնք կկիսեն այդ գաղափարները, Հնչակյան կուսակցությունը կմիանա: Նախևառաջ Հնչակյան կուսակցությունը ինքնուրույն ուժ է, ունի իր ծրագիրը, իր առաջարկները, մտքերը: Եվ որ ուժերը հետևեն այդ գաղափարներին և աջակցեն՝ Հնչակյան կուսակցությունը կունենա իր ասելիքը, իր ձայներով կուսակցությունը կմիանա:
– Մի՞թե կարծում եք՝ Ծառուկյանը հետևելու է ՍԴՀԿ գաղափարներին, ծրագրերին և դրանք կյանքի կոչելու ուղղությամբ քայլեր կանի: Շատերի բնորոշմամբ՝ օլիգարխները հավաքվում են «Ծառուկյան» դաշինքում, այդ դեպքում ի՞նչ գործ ունի այնտեղ ՍԴՀԿ-ն:
– Յուրաքանչյուր քաղաքական գործիչ կամ դաշինք կարիք ունի տարբեր ոլորտներում ունենալու պլատֆորմ: Եթե դաշինքում ընկերային, ժողովրդային, ընկերվար գաղափարները Հնչակյան կուսակցությունն ինքն ամբողջացնի, և այդ դաշինքն ընդունի կուսակցության առաջարկած մտքերը՝ ինչո՞ւ ոչ: Ես որևէ արգելք և խոչընդոտ չեմ տեսնում: Կարևորը քաղաքական կամք ունենալն է և աշխատելը, որ այդ ծրագրերը կյանքի կոչվեն՝ ապահովելով ժողովրդին ընկերային և ժողովրդավար մթնոլորտ:
– Կարծում եք՝ «Ծառուկյան» դաշինքը մինչև վե՞րջ կգնա՝ հաշվի առնելով երկու տարի առաջ տեղի ունեցածը:
– Գիտեք, քաղաքականությունը ոչ ճշգրիտ գիտություն է, տվյալներն ամեն րոպե փոփոխվում են: Եվ քաղաքական գործչի պատասխանատվությունն է հետևել այդ փոփոխություններին, հետևելով՝ ճշգրիտ դատել և որոշումներ կայացնել: Երկու տարի առաջ քաղաքական կացությունը և ներկա կացությունը տարբեր են, խոհեմ քաղաքական գործիչը կայացնում է իր որոշումները և հստակեցնում իր անելիքները:
– Կարծո՞ւմ եք՝ձեր կուսակցությունը եթե առանձին մասնակցեր, նվազագույն անցողիկ շեմը չէ՞ր կարողանա հաղթահարել: Այսինքն՝ ռեալ գնահատե՞լ եք ձեր հնարավորություննե՞րը:
– Գիտեք, ամեն ինչ կախված է նրանից, թե ինչ ծրագիր եք ներկայացնում, և այդ գաղափարներն իրականացնելու համար ինչ միջոցներ կան ընտրված: Այսինքն՝ երբ միտքը, ծրագիրը, միջոցը միանան իրար, բոլոր հարցերը կհարթվեն: Մեկ անգամ կուսակցությունը մասնակցեց ընտրություններին առանձին իր ցուցակով: Դժբախտաբար, արդյունքները գոհացնող չէին այլ պատճառներով: Հիմա քանի որ ընտրությունները որոշված են ապրիլի 2-ին, և կուսակցությունը, անշուշտ, ուսումնասիրել է մեր կուսակցության հայաստանյան անդամների առաջարկները, կարծում եմ՝ Հնչակյան կուսակցությունը պետք է անպայման մասնակցեր ընտրություններին, իսկ թե ինչ կերպ՝ դաշինքով, թե առանձին ցուցակով, կարծում եմ՝ սա Հայաստանի վարչության որոշումն է, և մենք էլ Սփյուռքից պետք է կարողանանք թիկունք կանգնել իրենց որոշումներին:
– Ձեր բոլոր կառույցները համակարծի՞ք են այս ձևաչափով ընտրություններին մասնակցելուն:
– Անշուշտ:
– Իսկ ի՞նչ սպասումներ կան առաջիկա խորհրդարանական ընտրություններից:
– Ժողովուրդն ինչպես որոշեց, այդպես էլ կլինի, քանի որ ընտրությունները ժողովրդի համար են, և ժողովուրդն ինքն է որոշում:
