Ադրբեջանական Trend լրատվական գործակալության փոխանցմամբ՝ Ադրբեջանի էկոնոմիկայի փոխնախարար Սահիլ Բաբաևը Բաքվում ընթացող Iran Project-2016 ցուցահանդեսի ժամանակ հայտարարել է, որ իրանական ընկերությունները Ադրբեջանի տնտեսությունում ներդրել են 2.6 միլիարդ դոլար:
Նրա խոսքերով՝ այդ գումարից միայն 145 միլիոն դոլարն է ներդրվել ոչ նավթային սեկտորում, և որ Ադրբեջանում գործում է իրանական կապիտալով մոտ 450 ընկերություն.
«Իրանի ու Ադրբեջանի միջև հարաբերությունները թևակոխել են նոր փուլ, դրանք հատկապես ակտիվորեն զարգանում են վերջին 2.5 տարում: Պետությունների ղեկավարները երկու տարուց քիչ ավելի ժամանակահատվածում հանդիպել են 7 անգամ:
Անցկացվել է ավելի քան 80 փոխադարձ հանդիպում և ստորագրվել ավելի քան 40 փաստաթուղթ: Տեղի է ունեցել նաև միջկառավարական հանձնաժողովի երկու նիստ:
Փետրվարին Ադրբեջանի նախագահ Իլհամ Ալիևը շատ հաջող այց կատարեց Իրան, իսկ օգոստոսին Ադրբեջան այցելեց Իրանի նախագահ Հասան Ռուհանին:
2016 թվականի առաջին 7 ամսում երկրների միջև ապրանքաշրջանառության ծավալն աճել է 70 տոկոսով: Ուրախալին ան է, որ աճում է ինչպես Ադրբեջանից արտահանման ծավալը, այնպես էլ Իրանից ներկրման ծավալը»:
