«Հիմնադիր խորհրդարան»-ի և համակարգող խորհրդի անդամ Ալեք Ենիգոմշյանը «Առաջին լրատվական»-ի հետ զրույցում անդրադառնալով վաղը Ազատության հրապարակում կայանալիք հանրահավաքին՝ օրակարգային հարցերից կարևորեց հասարակության մասնակցությունը, ինքնադրսևորումը ընթացող գործընթացներին. «Ինչպես ես արդեն ասել եմ՝ հանրահավաքները պետք է լինեն շարունակական գործընթացի հանգրվանները»:
Պարոն Ենիգոմշյանը վստահեցրեց, որ քաղաքական գործընթացի առումով մի քանի ուղղություններով կան քննարկումներ և տարբեր աշխատանքների շուրջ զարգացումներ. «Մենք բոլորով դրանց ականատեսը կլինենք առաջիկա օրերին և շատ մոտակա շաբաթներին»:
Նրա խոսքով՝ վաղը կտրվի այս պահին քաղաքական իրավիճակի գնահատականը:
Հարցին՝ որքանո՞վ է ՏԻՄ ընտրություններին մասնակցելու Արայիկ Խանդոյանի որոշումը (չնայած իր թեկնածությունը հանելու Ձեր հորդորներին) տարաձայնություններ կամ պառակտում առաջացնում ձեր թիմի ներսում, Ալեք Ենիգոմշյանը պատասխանեց. «Վստահաբար, դա մեր թիմի ներսում պառակտման դրսևորում չէ: Վստահ եմ՝ «Սասնա ծռերը» շարունակում է կարծել, որ Հայաստանում ներկա ռեժիմի օրոք հնարավոր չէ քաղաքական իրավիճակ փոխել: Սակայն այդ որոշումը Արայիկ Խանդոյանի իրավունքն է, և ոչ մի խնդիր չպետք է տեսնել»:
Մեր զրուցակցի խոսքով՝ դա մարտավարական քայլ է, և այն հանգամանքը, որ նա իր թեկնածությունը դրել է հենց իր ծննդավայրում, ոչ թե ռազմավարական մոտեցում է, այլ անձնավորված, փոքր-ինչ լոկալ խնդիր:
«Առիթից օգտվելով՝ պիտի ասեմ, որ մենք բոլորս, նաև «Հիմնադիր խորհրդարանը», շարունակում ենք նույնքան սիրել և հարգել մեր շատ սիրելի Արայիկին: Նրա այդ քայլով «Հիմնադիր խորհրդարանի» օրակարգից և ռազմավարությունից շեղում չկա: Նաև խնդիր չկա Արայիկ Խանդոյանի հետ»,- ասաց Ալեք Ենիգոմշյանը՝ հավելելով, որ սա միգուցե «Միայնակ գայլի» որոշում է:
