Լատվիայում ամուսնական զույգը որոշել է դատական կարգով պարզել հարաբերությունները քաղաքացիության և միգրացիայի հարցերով վարչության հետ, որը հրաժարվել է գրանցել իրենց երեխային այն անունով, որը նա ստացել է ծնվելիս: Այս մասին հայտնում է Ves.lv-ն:
Բողոքը ներկայացրել է երեխայի հայրը՝ Լատվիայի քաղաքացի Ինդուլիս Բալմարքսը: Տղայի մոր մասին հայտնի է այն, որ նա Գերմանիայի քաղաքացի է: Երեխան լույս աշխարհ է եկել Բեռլինում, նրան անվանել են Հյուգո Մարկ: Երբ առաջացել է երեխային երկքաղաքացի դարձնելու անհրաժեշտությունը, լատվիական փաստաթղթերում նա գրանցվել է որպես Հյուգո Մարքս: Վարչությունը երեխայի անունը համապատասխանեցրել է իրենց լեզվի քերականությանը՝ հավելելով s վերջավորությունը:
Ծնողները ուղղում կատարելու խնդանքով դիմել են վարչությանը, սակայն մերժվել են, որից հետո որոշել են դիմել դատական մարմիններին:
Հայցվորները հայտարարում են, որ երեխայի անունը փոխելով՝ վարչությունը խախտել է ԵՄ իրավական նորմերը: Նույն հարցն արդեն քննվել է Եվրոպական դատարանում 2008 թվականին: Դատարանը որոշել է, որ ԵՄ տարածքում ազատ տեղաշարժի համար միության անդամ ցանկացած երկրում ծնված երեխան կարող է անունը ստանալ այն տեսքով, որով այն սահմանված է այդ երկրի օրենսդրությամբ:
