Սումատրա կղզում 5 ինդոնեզացի 3 օր անցկացրել է ծառի վրա՝ փրկվելով արնախում վագրերից, որոնք ավելի վաղ հոշոտել էին իրենց ընկերոջը՝ հաղորդում է BBC-ն:
Վեց ինդոնեզացիներից բաղկացած խումբը անցած հինգշաբթի մեկնել էր Սումատրա կղզու Գունունգ-Լյոսեր (Gunung Leuser) ազգային պարկի խուլ ջունգլիներ՝ որոնելու հազվագյուտ ծառատեսակներ, որի փայտից պատրաստում են բուրմունքներ:
Տղամարդիկ ծուղակ էին պատրաստել՝ արշավի ժամանակ իրենց սննդով ապահովելու համար, և պատահաբար որսացել էին վագրի ձագի, որը ստացած վնասվածքներից սատկել էր:
Մոտակայքում գտնվող վագրերը լսել էին սատկող փոքրիկի օգնության կանչը ու հայտնաբերելով մարդկանց՝ անցել էին գրոհի, ինչի հետանքով 1 մարդ սպանվել էր, իսկ մյուսները ստիպված էին փրկվելու նպատակով բարձրանալ մոտակա ծառերը:
Ողջ մնացած տղամադիկ բջջայինների օգնությամբ կապվել էին մոտակա գյուղերի բնակիչների հետ, որոնք դեպքի վայրում հայտնաբերելով վագրերին՝ ստիպված էին ձեռնունայն հեռանալ:
Շաբաթ օրը տղամարդկանց օգնելու նպատակով դեպքի վայր է ուղևորվել փրկարարական խումբ: Տեղի ոստիկանության հաղորդմամբ՝ փրկարարներից հավանաբար կպահանջվի երկու-երեք օր՝ օգնելու համար դժբախտության մեջ հայտնված մարդկանց:
Ընդ որում՝ ոստիկանները մարդկանց փրկելու նպատակով կարող են կրակել կամ քնեցնել վագրերին, եթե կենդանիներին հայտնաբերեն ծառի մոտակայքում:
