Թուրքական Cumhuriyet թերթի փոխանցմամբ, Մարմարա ծովի Իմրալը կղզում ցմահ բանտարկություն կրող քուրդ առաջնորդ, «Քրդստանի աշխատավորական» կուսակցության (PKK) հիմնադիր Աբդուլլահ Օջալանն իր փաստաբանների միջոցով քրդերին ապստամբության կոչ է արել.
«Քրդական հարցի կարգավորման համար այլևս հույս չի մնացել: Եթե դուք վստահ եք զգում ձեզ, ապա հետևեք Թունիսի ու Եմենի օրինակներին: Ես ձեզ չեմ կանգնեցնի:
Հունիսի 12-ին կայանալիք խորհրդարանական ընտրություններից հետո քրդերի դեմ քաղաքական ու ռազմական գործողությունները չեն դադարի: Ավելին` դրանք կարող են դառնալ առավել մասշտաբային:
Ամերիկյան Կենտրոնական հետախուզական վարչության (ԿՀՎ) ղեկավարի հնգօրյա թուրքական այցի ժամանակ Թուրքիան ու ԱՄՆ-ը գաղտնի համաձայնագիր են կնքել: Դրանով ենթադրվում է, որ Թուրքիան պետք է աջակցի Լիբիայի, Սիրիայի ու Իրանի նկատմամբ ամերիկյան մոտեցումները: Ստացվում է, որ Թուրքիայի քաղաքականությունը Սիրիայի ու Ւրանի նկատմամբ փոփոխություն է կրելու»:
Հիշեցնենք, որ փետրվարի սկզբին էլ Օջալանն իր փաստաբանների միջոցով Թուրքիայի քրդերին կոչ էր արել Դիարբեքիրը վերածել Կահիրեի Թահրիր հրապարակի. «Եթե քրդերը Դիարբեքիրում փողոց դուրս գան և օրերով տուն չվերադառնան, ապա իշխող «Արդարություն և զարգացում» կուսակցությունը (ԱԶԿ)` հանձին վարչապետ Էրդողանի, այլ ելք չի ունենա, քան նորանոր առաջարկներով հանդես գալը: Հենց այդ ժամանակ էլ կգա խաղաղությունը»:
Ինչ վերաբերում է Օջալանի ներկայիս կոչին, ապա պետք է հիշել, որ մոտ կես ամիս առաջ հենց նրա միջնորդությամբ PKK-ն մինչև հունիսի 15-ը երկարաձգեց մարտի սկզբից միակողմանիորեն խախտած զինադադարը: Ամենայն հավանականությամբ, Օջալանը թուրքական իշխանություններից հիասթափվել է այն պատճառով, որ այդ զինադադարի երկարաձգումից հետո թուրքական իշխանություններն իրենց առավել սանձարձակ պահեցին` ապրիլի 19-29-ը ձերբակալելով 880 քուրդ ցուցարարի:
