Որքան մոտենում է տրանսֆերային պատուհանը, այնքան ավելի շատ են խոսում այս կամ այն ֆուտբոլիստի որևէ ակումբ տեղափոխվելու մասին: Ներկայացնում ենք համաշխարհային մամուլի՝ օրվա ամենաուշագրավ տրանսֆերային խոսակցությունները:
Անտուան Գրիզման(«Ատլետիկո Մադրիդ»)
Ո՞ւր կարող է տեղափոխվել՝ «Չելսի»
Մադրիդի «Ատլետիկո»-ի կիսապաշտպան Անտուան Գրիզմանը Լոնդոնի «Չելսի»-ի գլխավոր տրանսֆերային նպատակն է: Այս մասին գրում է բրիտանական «Sunday Mirror»-ը: Աղբյուրի տեղեկություններով՝ մադրիդյան ակումբը, սակայն, չի պատրաստվում հրաժարվել ֆուտբոլիստի ծառայություններից, եթե որևէ ակումբ իրեն չվճարի նվազագույնը 25 միլիոն ֆունտ: Ավելի վաղ «Չելսի»-ի պորտուգալացի գլխավոր մարզիչ Ժոզե Մոուրինյոն հայտարարել է, որ ո´չ իրեն, ո´չ էլ թիմին հարկավոր չէ որևէ ֆուտբոլիստ: Նշվում է, որ «Չելսի»-ն հետաքրքրված է նաև Սայիդո Բերայինոյի, Գոնսալո Իգուայինի, Ջեյմի Վարդիի, Էմանուել Ադեբայորի և Ռոբին վան Պերսիի ծառայություններով:
Հարի Քեյն(«Տոտենհեմ»)
Ո՞ւր կարող է տեղափոխվել՝ «Մանչեսթեր Յունայթեդ»
Բրիտանական «Daily Star»-ի տեղեկություններով՝ անգլիական «Տոտենհեմ»-ի հարձակվող Հարի Քեյնը կարող է փոխել ակումբային գրանցումը, սակայն չհեռանալ Անգլիայից: Ավելի կոնկրետ՝ ֆուտբոլիստը կարող է մարզական կարիերան շարունակել «Մանչեսթեր Յունայթեդ»-ում: «Մանկունյանցիներ»-ը պատրաստ են Քեյնի տրանսֆերի համար 50 միլիոն ֆունտ հատկացնել: Ամեն դեպքում աղբյուրը նշում է, որ այս տեղափոխությունը կարող է կատարվել միայն գալիք ամռանը: Ընթացիկ մրցաշրջանում Քեյնը 15 խաղում 8 գոլի հեղինակ է դարձել ԱՊԼ-ում:
Ջեյմի Վարդի(«Լեյչեսթեր»)
Ո՞ւր կարող է տեղափոխվել՝ «Վալենսիա»
«Վալենսիա»-ի նորանշանակ գլխավոր մարզիչ Գարի Նևիլը ցանկանում է ուժեղացնել ակումբի հարձակման գիծն առաջիկա տրանսֆերային պատուհանի ընթացքում: «Մանչեսթեր Յունայթեդ»-ի նախկին ավագը, ով օրերս է ստանձնել «Վալենսիա»-ի գլխավոր մարզիչի պաշտոնը, հետաքրքրություն է ցուցաբերում անգլիական «Լեյչեսթեր»-ի հարձակվող Ջեյմի Վարդիի նկատմամբ: Այս մասին գրում է բրիտանական «Daily Star»-ը: Նշենք, որ Վարդին Պրեմյեր լիգայի ընթացիկ խաղարկությունում 15 խաղում դարձել է 14 գոլի հեղինակ, որից 11-ը՝ անընդմեջ՝ սահմանելով Պրեմյեր լիգայի բոլոր ժամանակների ռեկորդ, որի համար արժանացել է Գինեսի ռեկորդակիրների մրցանակին:
