Րաֆֆին այդպես էլ չկոնկրետացավ, «ի՞նչ ենք անելու ապրիլի 9-ին» հարցի պատասխանը չկա: «Առաջին լրատվական»-ի հետ զրույցում ասաց քաղաքագետ Արկադի Վարդանյանը՝ անդրադառնալով երեկ Ազատության հրապարակում կայացած հանրահավաքին և իր ստացած տպավորություններին:
Նա նշեց, որ ՀՀ նախագահական ընտրություններից հետո բոլոր հանրահավաքներին, ինչպես նաև երեկ տեղի ունեցած հանրահավաքի ժամանակ պահպանվեց անորոշությունը. «Րաֆֆի Հովհաննիսյանն ամեն հանրահավաքի ժամանակ ինչ-որ նոր տակտիկական նրբություններ էր մտցնում իր մարտավարության մեջ, և ամեն անգամ մեկը մյուսին հակասող էր ստացվում, անորոշությունը շատերին գցում էր տարակուսանքի, հուսահատության մեջ»:
«Երեկվա հանրահավաքին ևս ամենակարևորը՝ կոնկրետություն չեղավ, թե ապրիլի 9-ին ի՞նչ պետք է արվի: Ժամը 11.00-ին հավաքվենք, ժամը 12.00-ին հռչակենք «Նոր Հայաստան», բա հետո՝ ժամը 17.00-ին ինչո՞ւ ենք հավաքվում: Դա ոչ ոք չհասկացավ: Հավանաբար ինչ-որ մարտավարություն է մշակված, որի սկզբունքներն անձամբ ինձ հայտնի չեն, այդ պատճառով չեմ կարողանում կողմնորոշվել: Բոլորս տարակուսանքի մեջ ենք: Չենք հասկանում՝ ի՞նչ է պլանավորված: Մարդիկ հանրահավաքից հեռանում են ոչինչ չհասկացածի դեմքով: «Ի՞նչ ենք անելու ապրիլի 9-ին» հարցի պատասխանը երեկ չհնչեց: Եթե այդ հարցի պատասխանը հնչեր, կասեի, որ հռետորիկան կոշտացել է և դարձել է կոնկրետ»,- իր տպավորությունը ներկայացրեց Արկադի Վարդանյանը:
Վերջինիս համոզմամբ՝ Րաֆֆի Հովհաննիսյանը կամ չգիտի ինչ անել, չի պատկերացնում, թե որոնք են լինելու իր հետագա քայլերը, կամ ինչ-որ ուժերի հետ պայմանավորված չէ: Քաղաքագետի կարծիքով՝ երբ ժողովրդական պայքարը հասնում է վճռական փուլին, քաղաքական գործիչը պետք է ավելի ազնիվ ու կոնկրետ լինի, հասարակության մոտ փակագծեր չպետք է մնան: Ըստ Արկադի Վարդանյանի՝ երբ ժողովուրդը սկսում է զգալ, որ այստեղ ինչ-որ փակագծեր կան, պայմանավորվածություններ, ինչ-ինչ պահված մտքեր, հիասթափվում է: «Երևի դա էր հիմնական պատճառը, որ երեկվա հանրահավաքը սակավամարդ էր: Իմ տպավորությամբ՝ այս ամենը գնում է մարման, թեև ապրիլի 9-ից հետո փակագծերը չբացելն անիմաստ է դառնում»,- նկատեց նա:
Ստեղծված ներքաղաքական իրավիճակում, Արկադի Վարդանյանի կարծիքով, Սահմանադրությամբ նախատեսված բոլոր քայլերը հերթականությամբ արվել են, և կարելի է ասել, որ ապրիլի 9-ը իսկապես կլինի վերջնաժամկետն այն մարտավարության, որը կարելի է բնութագրել, որպես «սահմանադրական շրջանակներից դուրս չգալու մարտավարություն»:
«Սակայն ապրիլի 9-ից հետո՝ Սերժ Սարգսյանի երդմնակալությունից հետո, լիովին փոխվում է իրավիճակը: Ժողովրդի իրավունքն է երկիրը վերադարձնել Սահմանադրությանը ցանկացած տարբերակով: Ժողովուրդը պետք է որոշի իր ճակատագիրը, եթե այդ կամքն ու միասնությունը չունենա, ստիպված կլինի շարունակել գոյատևել այս խղճուկ պայմաններում»,- ասաց Արկադի Վարդանյանը:
