«Գարնանը, երբ տեղի են ունենում եղանակային լուրջ փոփոխություններ, սրվում են նաև խրոնիկ հիվանդությունները, ուստի սրտանոթային հիվանդությամբ տառապողները պարբերաբար պետք է խորհրդակցեն բժիշկների հետ և բուժման հարցում ինքնագործունեությամբ չզբաղվեն»,-այսօր լրագրողների հետ հանդիպմանն ասաց Երևանի գլխավոր սրտաբան Պարունակ Զեյվելյանը:
Նա նշեց, որ ինչպես ամբողջ աշխարհում, այնպես էլ Հայաստանում մահացությունների 50%-ից ավելին սրտանոթային բարդություններին է բաժին ընկնում, իսկ ամբողջ աշխարհում տարեկան 17 մլն մարդ է մահանում սրտանոթային հիվանդությունների պատճառով: 2030 թվականին այդ թիվը կհասնի 23 միլիոնի:
Բժիշկը զգուշացրեց, որ այս շրջանում օրգանիզմից եկող յուրաքանչյուր ազդակի պետք է լուրջ վերաբերվել և անմիջապես քննարկել բժիշկների հետ: Նրա խոսքով՝ սրտանոթային հիվանդություն ունեցողները չպետք է ինքնաբուժությամբ զբաղվեն և իրենց գանգատների մասին պետք է հայտնեն «ոչ թե սուրճի սեղանի, այլ բժշկի սեղանի մոտ»:
Բանախոսի խոսքով՝ Հայաստանում չի ավելացել սրտանոթային հիվանդություններով տառապող մարդկանց թիվը, պարզապես մարդիկ այժմ ավելի հաճախ են դիմում բժշկի օգնությանը. «Հայաստանում վերջին տարիներին նկատվում է սրտանոթային հիվանդությունների երիտասարդացում: Երիտասարդները հաճախ են անցնում բուժզննում, ինչը հնարավորություն է տալիս վաղ տարիքում կանխել հիվանդության հետագա զարգացումը»:
Սրտանոթային հիվանդություններից մահացությունը հնարավոր է նվազեցնել ալկոհոլի, ծխախոտի, անառողջ սննդի, թերակտիվության վերացման դեպքում. «Առողջ ապրելակերպի դեպքում սիրտանոթային հիվանդությունները ակնհայտորեն կնվազեն: Հատկապես պետք է ազատվել ավելորդ քաշից: Այս խնդիրն ունի մեր բնակչության 60%-ը»:
Ասուլիսի մյուս բանախոս՝ «Ինթրա» հոգեկան առողջության կենտրոնի գլխավոր հոգեբան Խաչատուր Գասպարյանն էլ հավելեց, որ մարդիկ դժվարությամբ են հարմարվում ինչպես եղանակային, այնպես էլ այլ փոփոխությունների: Նա նշեց, որ այս շրջանում փոխվում է նաև մարդկանց հոգեկան աշխարհը, շատերը սկսում են հագուրդ տալ վատ սովորություններին՝ պարտքեր են վերցնում կամ խաղամոլությամբ տարվում:
