Նաիրիտցիները որոշել էին այսօր անցկացնել նախորդներից տարբերվող ակցիա՝ իրենց հետ բերել էին նաև մանկահասակ երեխաներին, իսկ մանկասայլակների վրա գրված էր՝ տվեք տատիկիս, մայրիկիս, հայրիկիս, հորաքրոջս աշխատավարձերը:
Նաիրիտցի մի քանի տիկնայք իրենց հետ բերել էին նաև մանկական սուլիչներ և նվագող իրեր. «Զուռնա ենք բերել, որ մեր նվագի տակ վարչապետն ու կառավարությունը պարեն»,- նշեցին նաիրիտցիները:
Նրանք վրդովված հեռացան կառավարության մոտից՝ նշելով, որ վարչապետը արհամարհեց և այդպես էլ վախկոտի պես չիջավ կոնկրետ աշխատավարձերի վճարման ժամանակացույցի մասին խոսելու։ «Հազար ամոթ, հազար ամոթ, բա չիջնե՞ս ժողովրդին պատասխան տաս»,- նշեցին նաիրիտցիները:
Նրանք ասացին, որ արդեն ծայրահեղ քայլերի են պատրաստ, քանի որ անգամ կոմունալ վարձերը վճարելու գումար չունեն, հերթով անջատում են լույսը, գազը:
Նաիրիտցիները շաբաթը առնվազն երկու անգամ ակցիա են կազմակերպելու, նաև նստացույց կանեն: Նրանց խոսքով՝ եթե կառավարության անտարբերությունը շարունակվի, սև ժապավենով են հավաքվելու կառավարության դիմաց:
Մանրամասները՝ տեսանյութում։
