«Կարծում եմ՝ հաջողության հասնում է նա, ով յուրաքանչյուր անհաջողությունից հետո ավելի շատ է ձգտում հաղթանակի»,- «Առաջին լրատվական»-ի հետ զրույցում ասաց Գլխավոր դատախազության միջազգային իրավական կապերի բաժնի պետ Նելիկ Հարությունյանը, ով երկրորդ անգամ է առաջադրվել ՄԻԵԴ-ում ՀՀ դատավորի թեկնածու:
Հիշեցնենք, որ Ն. Հարությունյանը աշնանն էլ էր մասնակցում այս մրցույթին, համարվել էր հաղթող երեք թեկնածուներից մեկը, բայց ԵԽԽՎ-ն չէր ընդունել հայաստանյան մրցույթի արդյունքները: ԵԽԽՎ հատուկ մասնագիտական խումբը ՀՀ իշխանություններին պատասխանել էր, թե «Մարդու իրավունքների և հիմնարար ազատությունների պաշտպանության մասին կոնվենցիայի 21-րդ հոդվածի 1-ին մասի համաձայն՝ Եվրոպական դատարանի դատավորները պետք է ունենան բարձր բարոյական նկարագիր և բավարարեն բարձր դատական պաշտոններում նշանակվելիս ներկայացվող պահանջներին կամ լինեն ճանաչված իրազեկ իրավագետներ»:
Իսկ Հայաստանում մրցույթը կազմակերպող արդարադատության նախարարությունը հաղորդագրություն տարածեց, թե հենց Ն. Հարությունյանը չի համապատասխանում այդ չափանիշներին: «Կարծում եմ՝ ցանկացած գնահատական սուբյեկտիվ է: Տվյալ դեպքում՝ սա ևս»,- ասաց Ն. Հարությունյանը՝ ցանկություն հայտնելով նորից հայտնվել հաղթող եռյակի շարքում:
