Թուրքիայի արդարադատության նախարար Բեքիր Բոզդաղը խոսել է «Աշխատավորական կուսակցության» նախագահ, հայտնի հայատյաց Դողու Փերինչեքի գործով հունվարի 28-ին Մարդու իրավունքների եվրոպական դատարանում (ՄԻԵԴ) կայանալիք դատական լսումներից՝ Շվեյցարիային մեղադրելով «արժեքները խեղաթյուրելու» համար: Այս մասին հաղորդում է թուրքական «Հյուրիյեթ» պարբերականը։
«Առաջիկա օրերին ՄԻԵԴ-ի Մեծ պալատում կայանալու են դատական լսումները։ Դողու Փերինչեքը հայտարարել է, որ «Հայոց ցեղասպանություն չի եղել», և այդ խոսքերի համար Շվեյցարիան նրան դատարանի առաջ է կանգնեցնել։ Թեև ՄԻԵԴ-ը հայտարարեց, որ Փերինչեքը մեղավոր չէ, Շվեյցարիային հաջողվեց գործը Մեծ պալատ տեղափոխել։
Արևմուտքը Թուրքիային մշտապես քննադատում է խոսքի ազատության մակարդակի համար, մինչդեռ հենց արևմտյան արժեքներ կրող Շվեյցարիան սահմանափակում է խոսքի ազատությունը՝ արգելելով իր երկրի տարածքում արտասանել «Հայոց ցեղասպանություն չի եղել» արտահայտությունը։
Այս գործը Թուրքիայի համար լուրջ փորձություն է լինելու», – ասել է Բոզդաղը։
Հիշեցնենք, որ 2005 թվականին Դողու Փերինչեքը Շվեյցարիայում հայտարարել էր, որ Հայոց ցեղասպանությունը «իմպերիալիստական սուտ է»։ Այս խոսքերի համար շվեյցարական դատարանը նրան 90-օրյա ազատազրկման էր դատապարտել, և որպես այլընտրանք՝ Փերինչեքը պետք է վճարեր ցեղասպանությունները ժխտողների համար օրենքով սահմանված տուգանքը։
Սակայն 2013 թվականի դեկտեմբերի 17-ին Մարդու իրավունքների եվրոպական դատարանը բավարարել էր Փերինչեքի հայցն ընդդեմ Շվեյցարիայի՝ պատճառաբանելով, թե իբր Շվեյցարիան խախտել է Մարդու իրավունքների եվրոպական կոնվենցիայի 10-րդ հոդվածը, այսինքն՝ խոսքի ազատության իրավունքը:
Այս որոշումից հետո Շվեյցարիայի կառավարությունը դիմեց ՄԻԵԴ՝ բողոքարկելու Փերինչեքի գործով որոշումը։ Նախորդ տարվա հունիսին ՄԻԵԴ-ի հինգ դատավորներից բաղկացած կազմը կայացրեց գործի քննությունը դատարանի Մեծ պալատ ընդունելու մասին որոշում:
Ժամանակին «Էրգենեկոնի» գործով ցմահ ազատազրկման դատապարտված, սակայն 2014 թվականին դատարանի որոշմամբ երկիրը չլքելու պայմանով ազատ արձակված Փերինչեքի վրա դրված արգելքն օրերս չեղյալ է հայտարարվել Թուրքիայի վճռաբեկ դատարանի կողմից։ Արգելքը չեղյալ հայտարարելուն կողմ էր արտահայտվել նաև Թուրքիայի արտաքին գործերի նախարար Մևլութ Չավուշօղլուն:
