Թեև Վայոց Ձորի նորանշանակ մարզպետ՝ ՀՀԿ-ական Հարություն Սարգսյանը նշանակվելուց հետո հայտարարեց, թե չի ազատվելու նախկին մարզպետի կադրերից, սակայն երեկ մենք ականատես եղանք նրա հավաստիացումների ճիշտ հակառակին: Հարություն Սարգսյանի առաջարկով վարչապետ Հովիկ Աբրահամյանը երեկ ազատեց Վայոց Ձորի փոխմարզպետ Արամ Գրիգորյանին զբաղեցրած պաշտոնից:
Մարզպետը «Առաջին լրատվական»-ի հետ զրույցում ասաց, թե այդ ազատումը չի նշանակում, որ ինքը կադրային ջարդ է սկսել և ազատվում է Էդգար Ղազարյանի կադրերից: «Ի՞նչ է նշանակում Էդգար Ղազարյանի կադր: Ղազարյան էդգարն էլ է մեր գործընկերը, Արամ Գրիգորյանն էլ: Ուղղակի տենց ստացվեց: Գրիգորյանի ազատումն այլ բաներով էր պայմանավորված, այլ խնդիրներ կային, թե չէ ինքը ինձ էլ շատ հարազատ մարդ էր»,- ասաց Սարգսյանը՝ հրաժարվելով մանրամասնել, թե հատկապես ինչ խնդիրներով էր պայմանավորված իր տեղակալի ազատումը:
Մարզպետը հերքեց նաև լուրերը, թե պատրաստվում է թափուր աշխատատեղերը համալրել իր կադրերով: «Ոչ, ոչ, դեռ ոչ: Էդ կարգի բան չկա: Ու դեռ ոչ մեկն էլ չի փոխարինում Գրիգորյանին»:
Մինչդեռ «Առաջին լրատվական»-ի տեղեկություններով՝ մարզպետը փոխմարզպետի թափուր տեղի համար արդեն իսկ հավակնորդ ունի, և նա իր աներձագն է՝ Վասիլ Ասլանյանը, ով այս պահին, Սարգսյանի մարզպետ նշանակվելուց հետո, Վայքի քաղաքապետի պաշտոնակատարն է:
Եվ Վայքի քաղաքապետի ընտրություններից հետո մարզպետը նրան կտեղափոխի մարզպետարան: