Սուրբ Սարգիս եկեղեցում այսօր տեղի ունեցավ ադրբեջանական զինուժի կողմից խփված հայկական Մի-24 ուղղաթիռի օդաչուների՝ Սերգեյ Սահակյանի, Ազատ Սահակյանի, Սարգիս Նազարյանի հոգեհանգստի արարողությունը:
«Ուղղաթիռի հրամանատարին՝ Սերգեյ Սահակյանին ճանաչում եմ 21 տարի, միասին ծառայել ու երկար ուղի ենք անցել։ Հոյակապ անձնավորություն էր՝ բարձր ինտելեկտով օժտված, պատրաստված օդաչու էր: Սարգիս Նազարյանը շուրջ երեք տարի է՝ ծառայում էր զորամասում, ավագ լեյտենանտ էր, կողային տեխնիկ»,- լրագորղների հետ զրույցում ասաց զորամասի շտաբի պետի տեղակալ, մայոր Ստեփանյանը:
Նա հավելեց, որ մենք հակառակորդին նոր չենք ճանաչում․ «Դա այն հակառակորդն է,որ քնած ժամանակ կացինով մարդ է սպանում»:
Մայոր Գոռ Ղազարյանն էլ նշեց, որ 19 տարի ծառայել է Սերգեյ Սահակյանի հետ․ «Կիսել ենք մեր ծառայության բոլոր դժվարություններն ու ուրախությունները: Ծանր է խոսել Ազատի ու Սարգիսի մասին, երկուսն էլ կարգապահ ու բանիմաց էին, ու դժվար թե անկարգ սպաների նման առաջադրանք տրվեր: Առանձնապես սպասելու բան չկար Սաֆարովի նման ստահակներ հերոսացնող պետությունից: Մենք տղաներին խոսք ենք տալիս, որ իրենց փայ երկնակամարին տեր ենք լինելու, ու թող Հեյդարի թոռնիկներն էլ իմանան, որ արծիվները երկնքում են ծնվում»:
