Այսօր Հայաստանում տեղակայված ռուսական ռազմակայանում ավարտվում է օրերս մեկնարկած քիմիական ու կենսաբանական պաշտպանության մարտավարական զորավարժությունը: Ռուսական լրատվամիջոցների փոխանցմամբ՝ վարժանքներին մասնակցել են քիմիական-կենսաբանական և ռադիացիոն պաշտպանության (РХБ) ստորաբաժանումները՝ շուրջ 100 զինծառայողներ և 30 միավոր ռազմական ու հատուկ տեխնիկա: Նույն այդ աղբյուրների համաձայն՝ զորավարժության նպատակը արտակարգ իրավիճակներում քիմիական ու կենսաբանական վարակից պաշտպանվելն ու հետևանքների վերացումն է, քիմիա-կենսաբանական և ռադիացիոն պաշտպանության ստորաբաժանումների մասնագետներին սովորեցնելը հայտնաբերել և ոչնչացնել ինֆեկցիոն հիվանդությունների տարածման հարուցիչները, ախտահանել խմելու ջրի աղբյուրները և ջրամբարները, ինչպես նաև քիմիական մշակման ենթարկել փորձադաշտին կից ճանապարհները:
Զորավարժությունից առաջ Ռուսաստանի զինված ուժերի Հարավային օկրուգի մամուլի ծառայության տարածած հաղորդագրության համաձայն՝ զորավարժությունների ընթացքում «Կամխուդ» փորձադաշտում մշակվելու և ախտահանվելու են երեք քառակուսի կիլոմետր պայմանական վարակված տարածք և մեկ տասնյակ ճանապարհներ, որի նպատակով օգտագործվելու են 150 կիլոգրամ քիմիական ախտահանիչ չոր նյութեր:
«Առաջին լրատվական»-ի հետ զրույցում Ռազմական կանխատեսման կենտրոնի տնօրեն, ռուսաստանցի ռազմական փորձագետ Անատոլի Ցիգանոկը նշեց, որ սովորաբար այն բոլոր զորավարժությունները և մարտական պատրաստվածությունները, որոնք անցկացվում են ՌԴ ԶՈՒ-ում, անցկացվում են նաև այն բոլոր բազաներում, որտեղ տեղակայված են ռուսական զորքեր, այսինքն՝ Հայաստանում, Տաջիկստանում, Մերձդնեստրում, Ղրիմում: Սա, ըստ նրա, բնականոն պրակտիկա է, պլանային զորավարժություններ են՝ ուղղված քիմիական-կենսաբանական և ռադիացիոն պաշտպանության ստորաբաժանումների պատրաստվածության բարձրացմանը:
«Թե ինչո՞ւ է հիմա անցկացվում նման զորավարժություն՝ կարող եմ դիտարկել երկու տարբերակ: Առաջին՝ ես գտնում եմ, որ սա իրականացվում է ուկրաինական զարգացումների ֆոնին, այնտեղ, ի դեպ, շատ ակտիվ մասնակցություն էին ունեցել քիմիական-կենսաբանական և ռադիացիոն պաշտպանության ստորաբաժանումների զորքերը: Երկրորդ՝ հայտնի է նաև, որ Վրաստանի տարածքում գործում են շուրջ 3 լաբորատորիաներ, որոնք արտադրում են կենսաբանական ռազմամթերք, ուստի անհրաժեշտ է ունենալ համապատասխան ունակություններ այդ նյութերի հայտնաբերման համար: Սրանք անհրաժեշտ հմտություններ են, որոնք ժամանակ առ ժամանակ պետք է կատարելագործվեն»,- ասաց Անատոլի Ցիգանոկը:
Վերջինս ամենևին չի կարծում, թե այս զորավարժությունները որևէ առնչություն ունեն տարածաշրջանում ԻՊ սպառնալիքի հետ, քանի որ այս սպառնալիքին դիմակայելու համար այլ պատրաստվածություն է անհրաժեշտ: «Այս պլանային զորավարժություններն ամենևին էլ չեն խոսում այն մասին, որ Հարավային Կովկասում պայթյունավտանգ իրավիճակ է, և կան սպառնալիքներ»,- հստակեցրեց Անատոլի Ցիգանոկը:
Նկատենք նաև, որ նման զորավարժություններ վերջերս չեն անցկացվել այլ երկրների ռազմաբազաներում, որտեղ տեղակայված են ռուսական զորքեր: