Ամերիկյան սոցիոլոգները ամփոփել են 2010թ. անցկացված իրենց ուսումնասիրությունների արդյունքները: Մոտ 100 երկրներում անցկացված հարցումների արդյունքները ցույց են տվել, թե տարբեր երկրներում ինչպես են վերաբերվում համաշխարհային քաղաքականության առաջատարներին: Այս մասին հաղորդում է «Ազատություն» ռադիոկայանը:
Ըստ այդմ` պարզվել է, որ հայաստանցիների 75 տոկոսը դրական է գնահատում Ռուսաստանի ղեկավարության որդեգրած քաղաքականությունը` այն բնութագրելով որպես արդյունավետ: Այս մտքին ընդդիմացող մեր հայրենակիցների թիվը շատ քիչ է եղել` ընդամենը 7 տոկոս:
«Պուտինասիրությամբ» հայերը զիջում են միայն աֆրիկյան Մալիին, Ուզբեկստանին, Տաջիկստանին և Ղրղզստանին:
ՌԴ իշխանությունների քաղաքականությունը, ինչպես և կարելի է ենթադրել, ամենաքիչ աջակցությունը ստանում է Վրաստանի քաղաքացիների կողմից: Հարցված վրացիների 76 տոկոսը խստորեն դատապարտում է պաշտոնական Մոսկվայի քաղաքական ուղեգիծը եւ միայն 6 տոկոսն է, որ արդյունավետ է գնահատում այն քայլերը, որ իրականացնում են Դմիտրի Մեդվեդեւն ու Վլադիմիր Պուտինը:
Մյուս պետությունը, որի ղեկավարության քաղաքականությունն արժանանում է Հայաստանի բնակիչների ջերմ աջակցությանը, Ֆրանսիան է: Հայաստանցիների 62 տոկոսը դրական եւ միայն 12 տոկոսն է բացասական գնահատում Սարկոզիի վարչակազմի գործունությունը: Վրաստանում Ֆրանսիային դրական են վերաբերվում հարցվածների 43, Ադրբեջանում` 42, իսկ Թուրքիայում` ընդամենը 22 տոկոսը:
Միացյալ Նահանգների հանդեպ հայաստանցիների վերաբերմունքը եւս բավական դրական է: 2010-ին անցկացված հարցումների համաձայն` հայաստանցիների 50 տոկոսը դրական է գնահատում ԱՄՆ ղեկավարության գործունեությունը, իսկ 32 տոկոսը` բացասական: Նշեմ, որ նախորդ երկու տարիներին Վաշինգտոնի նկատմամբ վստահության ցուցանիշը Հայաստանում ավելի բարձր էր` 54 տոկոս: Ադրբեջանում Միացյալ Նահանգների ներկա վարչակազմի քաղաքականությունը հավանության է արժանացել հարցվածների 58, իսկ Վրաստանում` ընդամենը 47 տոկոսի շրջանում:
Ընդհանուր առմամբ, Gallup-ի տվյալները վկայում են, որ աշխարհում գերտերություններն այնքան էլ բարձր վարկանիշ չունեն: Ռուսաստանի ղեկավարության գործունեությունը արդյունավետ է համարում աշխարհի բնակիչների ընդամենը 27 տոկոսը, Մեծ Բրիտանիայինը` 35, իսկ, ասենք, Ֆրանսիայինը` 39 տոկոսը: