Փողերի լվացման մեջ մեղադրվող հայազգի խոշոր գործարար Լևոն Հայրապետյանի պաշտպանական կողմը մտադիր է բողոքարկել ընտրված խափանման միջոցը՝ կալանքը: Այս մասին RIA Novosti-ին հայտնել է փաստաբան Ռուբեն Մարգարյանը:
Մոսկվայի Բասմանի դատարանի դատավոր Նատալյա Մուշնիկովան այսօր Հայրապետյանին ուղարկել է Քննչական մեկուսարան՝ համաձայնելով քննիչի փաստարկների հետ, թե գործարարը հնարավորություն ունի թաքնվել իրավապահ մարմիններից ու ազդել վկաների վրա, ոչնչացնել ապացույցները:
«Բողոքում մենք կմատնանշենք մի շարք պահեր, այդ թվում, որ Հայրապետյանի գործունեությունը ձեռնարկատիրական է, ինչը նշանակում է՝ նա ենթակա չէ կալանքի»,- ասել է փաստաբանը:
Դմիտրի Մեդվեդևի նախագահության ժամանակ փոփոխություններ էին մտցվել ՌԴ Քրեական օրենսգրքում, որոնք արգելում են կալանքի տակ վերցնել անձանց, որոնք իրենց ձեռնարկատիրական գործունեության ընթացքում կատարել են տնտեսական հանցագործություններ:
Մարգարյանի կարծիքով՝ դատարանն անգամ անտեսել է այն փաստը, որ իր հաճախորդն ունի մի շարք հիվանդություններ, որոնց առկայությունը թույլ չի տալիս մեկուսացման մեջ գտնվել: