Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Արմեն Խաչատրյանի նախագահությամբ ավարտվել է Արայիկ Ավետիսյանի գործի դատական քննությունը:
50-ամյա Արայիկ Ավետիսյանը 2013 թվականի սեպտեմբերի 14-ին, ժամը 17-ն անց 30-ի սահմաններում Երևան քաղաքի Քանաքեռհէկ թաղամասի 9-րդ և 16-րդ շենքերի բակում տեղադրված զրուցարանում թղթախաղի ժամանակ ոչ ճիշտ խաղալու համար վիճաբանել է 1936 թվականին ծնված՝ 77-ամյա Վաչագան Մանուչարյանի հետ:
Նրանք քաշքշել են իրար:
Արայիկը հրել է Վաչագանին, վերջինս ընկել է, գլուխը հարվածել զրուցարանի մետաղական կառուցվածքներին:
Վաչագան Մանուչարյանը ստացել է գանգուղեղային փակ վնասվածք, բայց հրաժարվել է ահազանգով բակ ժամանած շտապօգնության բժշկի՝ հիվանդանոց տեղափոխվելու առաջարկից:
Վաչագանը գնացել է տուն:
Հաջորդ օրը՝ սեպտեմբերի 15-ին, նրա վիճակը վատացել է, նրան տեղափոխել են հիվանդանոց, որտեղ մի քանի օր անց՝ սեպտեմբերի 20-ին, Վաչագան Մանուչարյանը մահացել է:
Արայիկ Ավետիսյանին մեղադրանք է առաջադրվել անզգուշությամբ տուժողին կյանքից զրկելու համար՝ ՀՀ քրեական օրենսգրքի 109 հոդվածի 1-ին մասով:
Ավետիսյանն իրեն մեղավոր է ճանաչել, դատարանում հրաժարվել է ցուցմունքներ տալուց:
Նախաքննական ցուցմունքում Ավետիսյանն ասել է, որ բարիդրացիական հարաբերությունների մեջ է եղել տուժող Վաչագանի հետ:
Թղթախաղին մասնակցել են չորսով: Վաչագանը սխալ է խաղացել, դրա պատճառով վիճել են, հետո ոտքի են կանգնել ու սկսել են իրար քաշքշել: Ներկաները փորձել են բաժանել:
Քանի որ Վաչագանը շարունակում էր քաշել իր հագուստից, ինքը նրա ձեռքից ազատվելու համար աջ ձեռքով հրել է նրան: Վաչագանը հավասարակշռությունը կորցրել է, ընկել մետաղե նստարանին, գլխով հարվածել մետաղե սեղանին:
Ինքը չի պատկերացրել, որ հրելու հետևանքով Վաչագանը կարող է ընկնել ու մի քանի օր անց մահանալ:
Թղթախաղի մասնակից վկաներն ասել են, թե Վաչագանին բակում «Ռուբո» էին ասում, իսկ Արայիկի մականունը «Նաբի» է:
Վկա Սերգեյն ասել է, թե խաղից առաջ ինքը Վաչագանին խնդրել է «հարամ» չխաղալ, բայց Վաչագանը «հարամ» է խաղացել, Արայիկն էլ է նրան նկատողություն արել:
Վեճը թեժացել է:
Վաչագանը ոտքի է կանգնել, բռնել Արայիկի հագուստից, Արայիկը հրել է նրան: Վաչագանը մի երկու քայլ հետ է գնացել, նրա գլուխը դիպել է մետաղե սեղանի եզրին, մի փոքր արյուն է եկել, որից հետո այտուցվել է: Ինքն Արայիկին զրուցարանից դուրս է ճանապարհել, խնդրել է, որ նա տուն գնա: Արայիկի գնալուց հետո Վաչագանը վեր է կացել, օրորվելով գնացել դեպի տուն: Ինքը գնացել է նրա հետևից, տեսել է, որ նա նստել է աստիճաններին: Նա ասել է, որ վատ է զգում: Իր հարսը չափել է նրա ճնշումը, ջուր են բերել, լվացել «Ռուբոյի» գլուխը դեմքը, զանգել ու շտապօգնություն են կանչել:
Դատարանը հաշվի է առել, որ Արայիկ Ավետիսյանը Արցախյան ազատամարտի մասնակից է, բազմաթիվ պարգևների, պատվոգրերի ու շնորհակալագրերի է արժանացել:
Վաչագան Մանուչարյանի անզգույշ սպանության համար Արայիկ Ավետիսյանը մեղավոր է ճանաչվել ու դատապարտվել 6 ամիս ազատազրկման:
