Հայաստանում խոշտանգումների խորացման ու տարածման հիմնական պատճառներից մեկն անպատժելիության մթնոլորտն է, երբ պաշտոնյան համոզված է՝ անպատիժ է մնալու: «Առաջին լրատվական»-ի հետ զրույցում նման տեսակետ հայտնեց «Ընդդեմ իրավական կամայականության» ՀԿ նախագահ Միքայել Արամյանը՝ հավելելով, որ խոշտանգման հոդվածով գործերից երկու տոկոսն է հասնում դատարան, այն էլ՝ կամ համաներմամբ բաց են թողնվում, կամ կարճվում են:
Արամյանի խոսքով՝ պետությունն է կրում պատասխանատվությունը այս իրավիճակում, և նա պետք է իր կառավարման բոլոր օղակներն օգտագործի, իսկ ոչ գիտակցված մոտեցումն ավելի է նպաստում խոշտանգման երևույթի տարածմանը: Անդրադառնալով գլխավոր դատախազ Գևորգ Կոստանյանի հայտարարությանը, թե՝ այսուհետ ոլորտում կաշառքն ու անմեղ մարդկանց պատժվելը պիտի բացառվեն, նա նշեց, որ պետք է բոլորը հավասար լինեն, արդարադատություն իրականացվի, ոչ թե կամայական կամ անպատժելիության մթնոլորտ ստեղծվի:
Գլխավոր դատախազն, ըստ Արամյանի, դա պետք է երաշխավորի, ուրիշ ոչ մի բան դրանից ավել չի կարող անել, նա պարտավոր է դա անել: «Ես էդ ասածները չեմ ցանկանում մեկնաբանել, մարդու ասածը մեկնաբանվում է հետևություններ անելով կամ համեմատականներով, ուղղակի ասած խոսքը և տիրող իրավիճակը պետք է համապատասխան լինեն, որևէ պաշտոնյա, որ պարտավորություն է կրում հետևելու օրենքի կիրառմանը, իրավունք չունի այդպիսի խոսքեր ասելու կամ խոստումներ տալու: Նրա պարտականությունն է, որ օրենքի կիրառումը կամ արդարադատությունը Հայաստանում գործի, սրանով ամեն ինչ ասված է»,- ասաց նա:
