Ինչպես ավելի վաղ տեղեկացրել էինք, Երուսաղեմում Քրիստոսի գերեզմանի տաճարը Իսրայելի իշխանությունների կողմից կարող է փակվել ջրամատակարարման համար մոտ երկուսուկես միլիոն դոլար պարտքեր կուտակած լինելու պատճառով:
«Առաջին լրատվական»-ին հաջողվեց տեղեկանալ, որ գերեզմանը դեռ չի փակվել և հնարավոր է՝ չփակվի: Հայերը՝ հույների և կաթոլիկների հետ միասին, գերեզմանի սեփականատերեր են, նույն դիրքն են գրավում և ունեն հավասար իրավունքներ:
Երուսաղեմի հայոց պատրիարքի տեղապահ Արիս արքեպիսկոպոս Շիրվանյանն «Առաջին լրատվական»-ի հետ զրույցում նշեց, որ հայերը, հույները և կաթոլիկները համաձայն չեն պարտքերը մուծելու հետ, և հիմա խորհրդակցաբար պետք է մեկ ընդհանուր որոշման գան և խնդիրը Իսրայելի կառավարության ուշադրությանն արժանացնեն: Արիս սրբազանը նշեց, որ իսրայելական տարբեր կառավարությունների օրոք տաճարի համար որևէ վճարում չի իրականացվել, միշտ անվճար հիմունքներով է եղել, և հիմա իրենք ուզում են այդ կարգավիճակը պահել և պաշտպանել:
«Այսօր սկսում ենք բանակցությունները, տակավին հանդիպումներ կարող ենք ունենալ, միասնական դիրքորոշում պետք է արտահայտենք: Թե երբ հարցը վերջնական լուծում կստանա, չեմ կարող ասել, պետք է համակարգենք հանդիպումը, չեմ կարող ասել վա՞ղը կլինի, թե՞ մյուս օրը, թե՞ մյուս շաբաթ, դա կապված է նաև մյուս թեմերի ժամանակացույցից»,- ասաց նա՝ հավելելով, որ եթե անգամ հանդիպումը ձգձգվի, միևնույն է, տաճարը չի փակվի, փակվելը ամենավերջին միջոցն է։ Նա հույս հայտնեց, որ դրանից առաջ լուծում կգտնվի:
Արիս սրբազանը նաև նշեց, որ նամակներ կգրեն, կառավարության հետ անմիջական հանդիպումներ կունենան: «Այս պահին մեր միասնական կեցվածքն այն է, որ չվճարենք, իսկ եթե ուրիշ լուծում կարողանանք գտնել, եզրակացության կբերվի, բայց առայժմ սա միայն իմ կարծիքն է, պետք է որ հոգևոր պետերի հետ հանդիպում ունենանք, որ ճշտենք այդ»,- ասաց նա:
Այս խնդիրը նոր չէ, այն առկա է արդեն երկու տարուց ավելի, քանի որ 2 տարի առաջ տեղի իշխանություններն ուժը կորցրած են ճանաչել Օսմանյան կայսրության ժամանակներից սահմանված՝ ջրամատակարարման կամ այլ կոմունալ ծառայությունների համար տրվող արտոնությունները, և հիմա իրենք հրաժարվում են վճարել գումարը, քանի որ տաճարը երբեք ջրի համար չի վճարել ոչ մի իշխանության օրոք:
Արիս սրբազանը նաև տեղեկացրեց, որ հույն եկեղեցու առաջնորդները խնդիրը լուծելու խնդրանքով արդեն դիմել են Իսրայելի կառավարությանը, սակայն պատասխան առայժմ չեն ստացել: Դրա համար հիմա միասնական դիրքորոշում են արտահայտելու:
