Հայաստանի ազգային կինոակադեմիայի նախագահ, կինոգետ Դավիթ Մուրադյանը ևս ներկա էր հայկական կինոյի պատմություն համար առանցքային կարևորություն ունեցեղ այս իրադարձությանը`
«Այն հանգամանքը, որ Լուվրն իր կինոցուցադրությունների դահլիճը տրամադրում է հայկական ֆիլմին , արդեն իսկ շահեկան է մեր երկրի համար: Լուվրը համաշխարհային խաչմերուկ է ոչ միայն այն իմաստով, որ այնտեղ հավաքված է համաշխարհային արվեստի մեծ հարստություն, այլև այցելուների առումով: Լուվրի խաչմերուկում ցուցադրված կինոն ստանում է միջազգային հնչողություն: Հարություն Խաչատրյանի «Սահման» ֆիլմը բավականին յուրօրինակ ձևով մատուցվեց Լուվրում: Անվանի կինոռեժիսոր Աբաս Քիառոստամին այդ օրերին անց էր կացնում իր ֆիլմերի ցուցադրությունը: Ծրագրի կազմակերպիչները Քիառոստամիին առաջարկել էին ցուցադրության համար ընտրել իր ֆիլմերից երկուսը և ևս մեկը` հմաշխարհային կինոյից: Նա ասաց, որ համաշխարհային կինոյից ընտրություն կատարելն իր համար շատ պարզ էր և դա Հարություն Խաչատրյանի «Սահման»-ն էր, որն առաջին իսկ դիտումից փոխել է աշխարհի հանդեպ իր վերաբերմունքը, իսկ հիմնական դժվարություն ինքն ունեցել է սեփական ֆիլմերի ընտրության հարցում:
Շատ խորհրդանշական է և ինքնին արժեքավոր, որ Աբաս Քիառոստամիի նման հեղինակության տեր արվեստագետի անձնական ընտրությունը կանգ է առել Հարություն Խաչատրյանի ֆիլմի վրա: Քիառոստամին հիմնականում խոսել է դեպի կյանքն ուղղված այն անկեղծ հայացքի մասին, որն ունի Հարություն Խաչատրյանի կինոաչքը: Ցուցադրությանը հայեր նույնպես կային, բայց գերակշիռ մասն այլ ազգերի ներկայացուցիչներ էին: Ֆիլմից հետո հանդիսատեսները շրջապատել էին կինոռեժիսորին և իրենց գնահատանքն էին արտահայտում: Կարծում եմ, որ այս ցուցադրությունը պետք է գրանցել որպես հայ կինոյի լուրջ հաջողություն»,- ասել է Դավիթ Մուրադյանը:
