Աշխարհի խոշորագույն ֆասթֆուդի ցանցը՝ McDonald’s-ը, հայտարարել է, որ պատրաստվում է Հնդկաստանում իր առաջին սրճարանը բացել բուսակերների համար, գրում է The Financial Times-ը:
Պարբերականի տվյալներով՝ հաջորդ տարի այդ երկրի երկու ուխտավորական կենտրոններում՝ Ամրիտսար և Կատրա քաղաքներում, կբացվի երկու սրճարան: Բուսակերների սրճարան բացելու միջոցով McDonald’s-ը ցանկանում է ընդլայնել իր ներկայությունն այդ երկրում, որտեղ արգելված է տավարի մսի օգտագործումը: Հնդկաստանում կովը համարվում է սուրբ կենդանի:
Ամերիկյան ընկերությունն իր առաջին սրճարանը Հնդկաստանում բացել է 1996թ.: Այդ ժամանակ ավանդական տավարի մսով համբուրգերների փոխարեն առաջարկվում էին գառան մսով բուրգերներ: Սակայն ավելի ուշ դրանք հանեցին ճաշացանկից, քանի որ հաճախորդների կարծիքով՝ դրանք չափազանց «ռետինե» էին:
Այժմ Հնդկաստանում գործում է McDonald’s-ի ընդամենը 271 սրճարան, որոնց ճաշացանկում ներկայացված է մի քանի բուսակերների սնունդ:
Նշենք, որ այսօր Հնդկաստանում բացվում է McDonald’s-ի գլխավոր մրցակիցներից մեկի՝ Subway-ի ռեստորանը բուսակերների համար:
