Al-Jazeera-ն հաղորդել է, որ Մուսուլման աստվածաբանների համաշխարհային միության ղեկավարը կոչ է արել գնդակահարել Քադաֆիին: Al-Jazeera-ի ուղիղ եթերում Ասուֆ Ալ-Քարդաուին ասել է, որ լիբիացի յուրաքանչյուր զինվորական պարտավոր է գնդակահարել Լիբիայի ղեկավար Մուամար Քադաֆիին հատկապես վերջին օրերին սեփական ժողովրդի դեմ գործած հանցանքների համար:
Այս հայտարարությունը հետևել է այն տեղեկություններին, համաձայն որոնց, Քադաֆին այլևս անկառավարելի է դարձել և ռմբակոծում է երկրի ողջ տարածքը` սպանելով հարյուրավոր մարդկանց: Ընդ որում, դա անում է ռազմական ամենաավերիչ զինատեսակներով` քանդելով շենքեր և փողոցներ:
Հայտնի է, որ ռմբակոծվել են Տրիպոլին, Բենղազին, ծովափնյա Միսուրատան, Ալ-Զաուիյան: Մինչդեռ լիբիական իշխանությունները և անձամբ Քադաֆիի որդին՝ Սեյֆ Ալ-Իսլամը, հերքում են ռմբակոծության փաստը: Որոշ վերլուծաբաններ այս գործողությունները անվանում են ցեղասպանություն սեփական ժողովրդի դեմ: Նույն Al-Jazeera-ի հաղորդմամբ` քաղաքները լի են վարձկաններով, որոնք մտնում են հիվանդանոցներ և գնդակահարում են վիրավորներին ու նրանց օգնություն ցուցաբերող բժիշկներին:
Որոշ տեղեկությունների համաձայն` տնային կալանքի տակ է գտնվում Զինված ուժերի գլխավոր հրամանատար, գեներալ-լեյտենանտ Աբու Բաքր Ունուս Ջաբերը, որը չի կատարել Քադաֆիի հրամանները: Շատերը զարգացումների արագ հանգուցալուծում են ակնկալում, քանի որ ամեն ինչ շատ արագ է փոփոխվում:
