Հունվարի կեսին, ինչպես հայտնի է, «Հայկական էլեկտրացանցեր» ՓԲԸ գլխավոր գործադիր տնօրեն Եվգենի Գլադունչիկն ազատվեց զբաղեցրած պաշտոնից: Դեռ 2010-ի աշնանը մամուլում շրջանառվում էին Գլադունչիկի` սպասվող պաշտոնանկության մասին լուրերը, և դրա հիմնական պատճառ էր նշվում այն, որ «ԻՆՏԵՐ ՌԱՕ ԵԷՍ»-ի ղեկավարությունը մտադիր է Գլադունչիկին ազատել, քանի որ ՀԷՑ-ում իրականացված աուդիտի արդյունքում մի քանի տասնյակ միլիոն դոլարի «կորուստ» է հայտնաբերվել:
Համակարգին ծանոթ` «Առաջին լրատվականի» իշխանական աղբյուրները հայտնում են, որ Գլադունչիկի կառավարման ողջ ընթացքում Ռուսաստանը, ըստ էության, «Հայկական էլեկտրացանցեր»-ում ոչ միայն ներդրումներ չի կատարել, այլև զբաղված է եղել միլիոնավոր դոլարներ կորզելով` ի տարբերություն Թբիլիսիի, որտեղ «ԻՆՏԵՐ ՌԱՕ ԵԷՍ»-ը վրաց իշխանությունների հետ աշխատել է հավասարը հավասարի հետ:
Բացի այդ, նույն աղբյուրի պնդմամբ` Գլադունչիկի հեռանալն էլ Հայաստանի վրա էժան չի նստել`ռուսները նրանից մի քանի տասնյակ միլիոն դոլար են պահանջել, և Գլադունչիկը «վճարել» է պահանջված գումարը: